HUBO NGA SUBURNO
Kusganong gipanghimakak sa Malakanyang ang pasangil nga gipanudlo ni Presidente Gloria Macapagal-Arroyo ang mga paryente sa mga kongresista sa dagkong katungdanan sa gobyerno pila ka adlaw dayon nilang luba sa impeachment proceedings sa Kongreso. Niinsistir ang mga torotot sa presidente nga ang 158 ka mga kongresista nga nibotar pagbasura sa impeachment complaints igo lang naminaw sa ilang konsiyensiya, nitahud sa kagustohan sa mga molupyo sa ilang distrito ug nipatigbabaw sa balaod.
Pero ang Philippine Center for Investigative Journalism (PCIJ), sa report ni Vinia Datinguinoo, nibisto sa di malalis nga ebidensiya nga di nasudnong interes ang gilantaw sa mga kongresista. Sa ilang pagsegurong di makaabot ang impeachment sa Senado, diin gikahadlokan sa Palasyo nga ang mayoriya sa mga senador naghinam-hinam na pagbitay sa presidente.
-o0o-
Niang makapakugang nga listahan sa web log sa PCIJ (www.pcij.org/blog/ ) sa mga kadugo sa sipsip nga mga kongresista nga gipanudlo sa Monetary Board, Commission on Higher Education, Subic Bay Metropolian Authority ug ubang ahensiya:
§ Juanita Amatong, bayaw ni Kongresista Prospero Amatong sa Compostela Valley, gitudlo sa Monetary Board niadtong Hulyo 4;
§ Nelly Favis-Villafuerte, asawa ni Kongresista Luis Villafuerte sa Camarines Sur, gitudlo sa Monetary Board sa samang adlaw, Hulyo 4;
§ Datu Zamzamin Ampatuan, ig-agaw ni Kongresista Simeon Datumanong sa Maguindanao, kinsa maoy chairman sa gikaintapang House Justice Committee, gitudlo sa National Anti-Poverty Commission niadtong Hulyo 14;
-o0o-
§ Sultan Yahya "Jerry" Tomawis, igsoon ni Kongresista Acmad Tomawis sa ALIF party-list, gitudlo sa Office of Muslim Affairs niadtong Hulyo 18;
§ Monib Maniri, igsoon ni Kongresista Faysah Dumarpa sa Lanao del Sur, gitudlo sa Office of Muslim Affairs niadtong Hulyo 22;
§ Nenalyn Santiago, igsoon ni Senador Miriam Defensor-Santiago, gitudlo sa Commission on Higher Education niadtong Agosto 1;
§ Lecira Juarez, kauban ni Kongresista Guillermo Cua sa COOP-NATCCO party-list, gitudlo sa Cooperative Development Authority niadtong Agosto 31; ug
§ Armand Arreza, ig-agaw ni Kongresista Prospero Pichay Jr. sa Surigao del Norte ug batabata ni Senador Richard Gordon, gitakdang itudlo nga administrador sa Subic Bay Metropolitan Authority.
-o0o-
Di lang taga administrasyon ang puntirya sa tentasyon sa Malakanyang. Hastang mga nakapirma na sa impeachment complaint wa pasayloa. Si Kongresista Alfonso Umali Jr. sa Oriental Mindoro nibisto nga giawhag siya ni Presidente Arroyo pagbakwi sa iyang pirma aron matudlo ang iyang igsoong si Reynaldo isip deputy commissioner sa Bureau of Customs.
Gipatawag sab sa Malakanyang si Kongresista Reynaldo Uy sa Western Samar, laing nakapirma sa impeachment complaint, ug gipakita ni Presidente Arroyo og papel sa pagpabalhin ni Maj. Gen. Jovito Palparan, kinsa gipasanginlang responsable sa lapad nga pagpangyatak sa tawhanong katungod, gikan sa Catbalogan, Western Samar ngadto sa Nueva Ecija. [30] leo_lastimosa@abs-cbn.com
No comments:
Post a Comment