Arangkada for October 11, 2005

 

     HUGAW NI OUANO

 

Bisan unsaon paghapin ni Pres. Arroyo ug sa iyang mga torotot sa gisugyot nga deklarasyon sa state of emergency, sibaw gyod gihapong pagduda nga nagplano ang Malakanyang pagdeklarar og martial law aron pagpig-ot sa tanang grupo nga nangampanya pagpalagpot niya gikan sa katungdanan. Ang kakuwang nag kaligdong sa administrasyon, nga wa katabangi sa lapad nga pagduda sa ka-lehitimo sa mandato sa presidente tungod sa wa pa matubag nga mga pangutana sa Garci tapes.

Gipasabot ni Justice Secretary Raul Gonzalez nga ang tuyo sa deklarasyon mao rang paghatag ni Pres. Arroyo og gahom pagbanos pagduma sa vital industries, sama sa mga kompaniya sa lana ug elektrisidad, aron pagbuntog sa nagbuntaog nga krisis nga nahiagoman sa nasud. Wa ning kapakalma sa mga grupong nakumbinser nga gitugkan nag sungay ang administrasyon.

-o0o-

Di ba ang mga torotot ra man sab sa presidente ang nangugat nga wa siyay labot sa paspas ug way kinutobang paglayat sa presyo sa lana? Di ba giawhag man gani sa Palasyo ang mga haligi sa industriya sa media paglusad og lapad nga kampanya pagkumbinser sa publiko nga way mahimo ang presidente pagdiktar sa mga puwersa sa merkado sa kalibotan nga maoy nakapapilo-pilo sa presyo sa lana?

Kon ideklarar ang state of emergency, kabut-an na ba sa Malakanyang ang presyo sa merkado sa kalibotan? Kapugngan na bang Opec sa pagkontrolar sa suplay ug sa presyo sa lana? Kaduphan na bang epekto sa presyo sa lana ngadto sa bayranan sa tubig, kuryente ug inadlawng mga palaliton?

Katoohan lang ang administrasyon kon angkunon nga nakatampo diay sila sa higanteng krisis. Mahimong pakpakan pa gani kon mosaad gamiton ang state of emergency paghipos sa tanang alyado sa presidente nga gipasanginlang mga kawatan.

-o0o-

Kon masaag ka sa Mandaue ug makasimhot sa nangalisbong mga basura, panguros na lang daan. Wa ka nay kadaganan kay managsama nang tanang barangay. Nalukop nang tibuok Mandaue sa wa makolekta ug nadugta na nga mga basura. Salamat sa pagpabaya sa lokal nga mga opisyal nga gipangulohan sa mayor, kinsa nagsalig nga ang mas luod niyang billboards habog ra kaayo aron maabot sa mga langaw nga nag-piyesta sa iyang hugaw.

Sud na sa pipila ka semana nga taas ang pila sa garbage trucks nga magpaabot og walo ka oras una makatam-ok sa Paknaan dumping site. Maong inay makabalik og katulo o kaupat pagtilok sa basura sa kabarangayan, makahakot na lag kausa.

Di kay kana ra. Sugod niadtong Sabado, wa na gyoy garbage truck nga nakatam-ok og basura. Kay gawas nga mangalubong ang mga sakyanan nga brayt kaayong gipalatay ni Ouano sa humok nga basurahan, nahutdan pa gyod og krudo ang bulldozer ug payloader nga otro sang nangalubong pagbira sa garbage trucks ug pagpatag ug pagtabon og anapog sa basura. [30]   leo_lastimosa@abs-cbn.com