Arangkada for October 13, 2005

 

     HULGA SA PABUTO

 

Hangtod nga duwa-duwaan lang gihapon sa kapolisan, kabomberohan ug lokal nga mga opisyal ang pagpatuman sa mga probisyon sa balaod nga naglegalisar sa pagpanghimog mga pabuto, mangandam na lang tang daan sa mosunod nga mga katalagman nga, simbako layo ra to, tabukon og pito ka lawod, peligrong mosablig na sab og dugo sa atong pagsugat sa pasko ug bag-ong tuig:

• Dugang pag-ulbo sa mga pabrika sa Lapulapu City, Bulacan ug ubang mga lugar nga nagsalig sa industriya;
• Pagkahimo sa mga pabuto nga kuwestiyonable ang kalidad, sama sa whistle bomb nga mobuto una sa di pa mo-whistle; nga segurong moresulta sa
• Pagka-pungkol sa mga mogamit sa mga pabuto, sa way paghisgut sa dagkong sunog nga mamugna sa mga kwitis nga inay mopaingon sa taas motibugsok na man hinuon paingon sa kabalayan nga nipa o kugon ang mga atop o gaay nga mga kahoy ray dapat.

-o0o-

Ubos sa balaod, ang mga pabrika sa pabuto kinahanglan nga may gilay-on nga labing menos 300 metros gikan sa kabalayan. Gawas sa pipila nga nituman sa lagda, ang kinabag-an sa mga pabrika sa Babag sa Opon sikit ra kaayo sa kabalayan, ang uban naa man gyod gani magsansan og pulboran ug mamutos sa mga pabuto sud sa ilang kabalayan. Ang ilang inadlawng pagpangluto sa kusina ug pagpanigarilyo pila lang ka dangaw gikan sa mga nagtipun-og nga mga pabuto maoy garantiya nga ang labing uwahing disgrasya, nga nipatay og duha ug seryusong niangol og laing tulo sa Sitio Radar, di maoy kataposang mga biktima sa iresponsableng negosyo sa pabuto.

Sama sa naandan, magbuwa na sang mga baba sa kapolisan, kabomberohan ug lokal nga mga opisyal pagpasidaan sa mga tighimo og pabuto nga gukdon na gyong tanang nakalapas sa balaod. Pero inigka bugnaw na sa patayng lawas sa mga biktima, mapulihan dayon sa kainit ug kagahob sa pagpangandam sa pasko ug bag-ong tuig, ug magpadayon ang tsamba-tsamba nga panginabuhi.

-o0o-

Ang mga nanghimog pabuto way tinguha pag-angin sa ilang mga silingan o pagbuno sa ilang kadugo. Ang pabuto giisip nga lehitimong tinubdan sa ilang panginabuhi. Pero kay nagdumili mang gobyerno pagiya nila, nahimo silang seryusong hulga sa mga kinabuhi ug kabtangan. Ang sinakong mga pabuto para sa kapolisan, kabomberohan ug lokal nga mga opisyal kada Disyembre nakapasamot sa ilang paglingiw sa bantang nga mga kalapasan.

Maong napasagdan ang pataka nga pagsagol sa mga sangkap (mga benggala ug fountain, inay igo lang mosiga, moapil nag ulbo), pagtinihik sa gitas-on sa mga pabilo (ang mas taas nga pagpaabot napulihan sa mas mugbong mga tudlo ug bukton) ug paglapas sa luwas nga gidaghanon sa pulbora (inay tinubdan sa kalingawan, ang mga pabuto mao nay labing bag-ong hulga sa terorismo). [30]  leo_lastimosa@abs-cbn.com