BUGKOS SA KAPINTAS
Usa sa mga hinungdan nganong napakyas ang oposisyon sa pagpalihok sa kinabag-an sa katawhan batok sa gikuwestiyon nga liderato ni Pres. Arroyo mao ang pagkabuakbuak sa nagkalainlaing grupo nga nakigbatok sa administrasyon ug ang lapad nga pagduda sa katawhan sa motibo sa mga lider sa oposisyon, nga nalabwan lang sa ilang pagduda sa kalehitimo sa pagdaog ni Pres. Arroyo sa niaging eleksiyon.
Nilampos si Pres. Arroyo pagbaraw sa kampanya pagpalagpot niya sa Malakanyang pinaagi sa padayong pagbuakbuak sa mga lider sa oposisyon—gihaylo ang mga nibungat sa ilang presyo ug gihudlat ang hugot nga nibarug sa ilang mga prinsipyo. Napamatud-an ni sa pagbasura sa impeachment complaint sa Kongreso—salamat sa mga alyado nilang kanhi pres. Joseph Estrada ug anhing diktador Ferdinand Marcos nga klarong didto pusta sa Palasyo.
-o0o-
Pero wa matagbaw si Pres. Arroyo nga nagtan-aw sa nagkatibuwaag nga oposisyon. Ambot nahadlok ba kahang magkahiusa ang iyang mga kaatbang human niya lubaa ang impeachment, o tinuod bang pagduda nga nahubog siya sa talagsaong kadaogan pagpugong sa pagsumiter sa articles of impeachment ngadto sa Senado, naghimo og mga lakang ang presidente nga naghatag og way laing kapilian sa mga grupong nakumbinser nga nanikas, nangawat ug namakak siya—apil nang mga nangiyugpos nga andam na lang untang magpaabot kinsay mag-una sa charter change o sa sunod eleksiyon sa 2010—gawas sa paghiusa ug paghingusog sa kampanya pagtapos na sa iyang ilegal nga pamunoan.
Ang kabangis nga gigamit sa presidente pagbungkag sa labing malinawong mga protesta batok niya di makapahadlok—hinunoa makapaisog ug makalig-on sa kinabag-an pagbarug batok sa bag-ong simbolo sa pagpanlugpit, panaugdaog ug wa pupanagang papaugat sa administrasyon nga—human nasakping nanikas, nangawat ug namakak—nahadlok na sa iyang kaugalingong anino.
-o0o-
Si kanhi bise pres. Teofisto Guingona Jr. tiguwang, masakiton ug laos na. Ang mga obispo nga nangu sa prosesyon mahimong isalikway nga magda sa tingog sa liderato sa gamhanang Simbahang Katoliko. Ang party list representatives sayon rang isnabon isip mga walhon. Bisan si Sen. Jamby Madrigal humok kapasanginlan nga oportunista. Ang nagkalainlaing mga grupo nga ninunot nila dali rang mahulagway nga way mga lingaw.
Pero dihang gibombahan silag tubig samtang malinawong naglakaw paingon sa Mendiola, silang Guingona, mga obispo, party list representatives ug ubang politiko nahimong higanteng mga simbolo sa bag-ong nigimok nga di na kapugngang pakigbisog para sa kausaban. Sama sa pagdakop sa pipila ka hamtong nga mga militante nga igo lang nitabok sa pedestrian lane paingon sa Mendiola, ang pag-aliwaros sa administrasyong Arroyo niabot na sa iyang kinapungkayan.
Sa usa ka pamilok, gipapas ni Arroyo ang bisan unsang nahibiling pagduda, panagana ug kahadlok sa kinabag-an sa katawhan sa dinaliang panginahanglan pagpalayas niya gikan sa Malakanyang. [30] leo_lastimosa@abs-cbn.com
No comments:
Post a Comment