ALAS NI GLO
Kon nagtoo mong di na si Pres. Arroyo ang nagkontrolar sa iyang pamunoan, kay gidiktahan na lang siya nilang kanhi pres. Fidel Ramos, House Speaker Jose de Venecia ug ubang mga politiko nga maoy nautangan og kabubut-on sa iyang pagpabilin sa puwesto, nahadlok kong dako mong sayop.
Klaro mong na-influencia sa dagway ni Pres. Arroyo niadtong Hulyo 8, kanus-a usa na lang ka lanot ang gikapyotan sa nagtakilid niyang pamunoan, nga morang naibtan ang presidente og higanteng tunok dihang nibutho si Ramos sa Malakanyang aron pagpadayag sa iyang suporta, pila lang ka oras human sa awhag ni kanhi pres. Corazon Aquino para sa iyang resignasyon.
-o0o-
Sayon kaayo ang pag-underestimate ni Arroyo: Di siya kamaong modiskurso, uga kaayo og pahiyom, way angay nga mowara-wara, bakikaw nga makighugoy-hugoy sa masa, bisan maghilak-hilak maldita lang gihapon og dagway ug tungod kay, pasayloa kay nahibawo kong di ni politically-correct, potot siya.
Ang iyang diskurso di sama kaugdang ug kadahunog sa kang anhing Ferdinand Marcos, ang iyang paghangop sa masa di sama kagaan ug katam-is sa kang kanhi pres. Joseph Estrada, ang iyang panagway di sama kalumo sa kang Cory Aquino, bisan ang iyang pangasaba di sama kalarino sa kang Susan Roces.
Pero bisan sa iyang mga limitasyon, gipamatud-an ni Arroyo nga mas hawod siya kay sa tanan niyang kaatbang pinaagi sa pagbaraw sa tanang gamhanang puwersa nga nagtinabangay sa pagpalagpot niya gikan sa Malakanyang.
-o0o-
Usa sa mga sekreto sa paglampos ni Pres. Arroyo pagpilit sa puwesto mao ang iyang katakos pagsud sa bolsa bisan sa iyang kaugalingong mga alyado. Dihang nakumbinser na niya silang Ramos ug de Venecia nga sugdan nang charter change (cha-cha), nga gipanegurong Ramos nga moputol sa termino ni Arroyo hangtod na lang sa sunod tuig, maisugong gideklarar ni Arroyo nga iyang tiwason ang iyang termino hangtod sa 2010.
Bisan ang mga kongresista nga iyang gisaaran sa langit ug yuta nagsugod nag bagulbol sa kapakyas sa presidente pagtuman sa iyang gisaad nga minilyon ka pesos nga kuwarta ug mga proyekto. Pero nihupas nang ilang kapuslanan. Kay hagbay rang nabasura ang impeachment complaint sa Kongreso.
-o0o-
Bisan ang pagtukod ni Arroyo og consultative commission pagtuon sa cha-cha di angayng ikalipay sa grupong Ramos. Kay way gihimo si Arroyo paglahugay sa Senado, bisan sa iyang kasilag ni Senate Pres. Franklin Drilon, kansang pagsalikway sa constituent assembly maoy garantiya nga di malaktod ang iyang termino.
Maong si Ramos nibuhi sa iyang torotot nga si Heneral Jose Almonte aron pagpasidaan ni Arroyo nga ang sitwasyon karon susama niadtong dayong Edsa Uno sa 1986. Pero si Arroyo dunay laing alas: Siya, di si Bise Pres. Noli De Castro ug ubang nangambisyong mopuli sa Palasyo, ang labing lig-ong yawe ni Ramos pagbalik sa gahom. [30] leo_lastimosa@abs-cbn.com
No comments:
Post a Comment