PADRINO NI TAN
Ang kadagkoan sa Cebu State College of Science and Technology (CSCST) nga gipangulohan sa ilang presidenteng si Dr. Jose Sal Tan nanganti nga way makabaraw sa gikuwestiyon nilang pagduma sa eskuylahan. Gipasaligan nilang ilang mga alalay nga kon magpabilin silang magtak-om, pul-an rang mga nanaway ug pasagdan silang magpadayon sa malipayong paghukhok sa kabos nga mga tinun-an ug pagpaburot sa ilang mga bolsa.
Sa sinugdanan, nagtoo kong gipabuhi nilang Tan ug kaubanan ang ilang dugo kay klaro mang inihap na lang ang ilang malipayong mga adlaw paghimong gatasan sa CSCST. Pero human nangligid ang daghang mga adlaw, nga way bisan usa ka ahensiya sa gobyerno nga nakaako pagbadlong sa makauuwaw nilang binuang, inanay kong nakumbinser nga may sukaranan ang ilang panghambog.
-o0o-
Dihay higayon nga hapit kada adlaw nako tukia ang mga pasangil sa anomaliya batok nilang Tan ug kaubanan—sama sa pagkobra og makabungog nga honorarium sa subjects nga giingong wa nila matudloi ug pagharos og mga diploma sa mga kurso nga giingong wa nila maeskuylahi—sa pamasin nga matandog ang hingtungdang mga ahensiya ug mga opisyal sa gobyerno ug ilang butangan og kinutoban ang higanteng eskandalo.
Pero si Cebu City Councilor Edgardo Labella ray nagpakabana. Nipasaka siyag resolusyon sa Cebu City Council pag-awhag sa Commission on Higher Education (Ched) pag-imbestigar sa mga pasangil batok nilang Tan ug kaubanan. Ang makapasubo mao nga ang Ched, kansang mga opisyal gikatahong napiskan sab sa abundang mga diploma sa CSCST, dali kaayong nakakita og planggana og nanghunaw nga di silang ka-imbestigar sa CSCST.
-o0o-
Napugos ko pagdangop ni Kongresista Simeon Kintanar, ang nangamahan sa balaodnon paghimong unibersidad sa CSCST. Pero niangkon si Kintanar nga wa siyang kasuhito sa CSCST main campus, ang iyang nahibaw-an mao ra nga maayog dagan ang Argao campus. Buot bang ipasabot ni Kintanar nga iresponsable siyang niawhag sa Kongreso paghimong unibersidad sa eskuylahan nga wa niya mailhi?
Sunod nakong gidangpan mao si Sen. Juan Flavier, sakop sa Board of Trustees sa CSCST, nga maoy tinuod nga nagkontrolar sa eskuylahan. Pero si Flavier niingon nga iyang batabata ray tigtambong sa mga tigom sa board. Wa siya mopakita og interes dihang akong gisayran sa seryusong mga pasangil batok nilang Tan.
-o0o-
Hinaot nga silang Flavier ug Kintanar wa maapil sa mga padrino nilang Tan nga nanglingiw sa mga binuang kay napiskan sa baratilyong mga diploma ug ubang grasya. Hinaot nga di tinod nga taphawng resulta sa imbestigasyon kay may mga opisyal sa Visayas Ombudsman nga suod kaayong Tan.
Ug hinaot nga di tinuod nga ang Commission on Audit lubay nilang Tan kay ang auditors nabuhong sa teaching loads ug ubang benepisyo, sama sa pagtudlo sa ilang mga paryente sa mga posisyon sa CSCST. [30] leo_lastimosa@abs-cbn.com
No comments:
Post a Comment