MAS LUWAS BA?
Kon nagtoo mong ato nang nakit-an ang labing bangis nga pagpamatay sa mga vigilantes sa gidudahang mga kriminal sa Sugbo, masulub-on kong mopahibawo ninyo nga ang Davao, kansang mas abante ug mas daghan nang naluba nga vigilante groups klarong maoy gikopya sa Sugbuanong vigilantes ug sa ilang mga padrino, duna pay mas kahadlokang salida nga mahimong makalikoy pagsamot sa lokal nga mga tigkopya.
Si Stephen Manangan sa DxAB Davao nitaho atol sa "Arangkada" sa DyAB Abante Bisaya nga samtang nahunong nang bantang nga pagpamusil ug pagpahagba sa suspitsadong mga kriminal sa kadalanan sa Davao, nisaka sang mga kaso sa pagkawagtang sa gikaintapang mga sakop sa katilingban. Ang wa na pag-agas sa dugo sa kadalanan wa magpasabot nga gibati nag kaluoy ang vigilantes sa ilang mga target.
-o0o-
Nahasol ang mga Davaoeño sa nabisto nga bag-ong paagi sa mga vigilantes paghipos sa ilang mga biktima: Gipugos nila pagpasakay ang gidudahang mga kriminal sa mga Pajero ug ubang luhong sakyanan, gida sa hilit nga kabaybayonan ug wa na gyod igkita sa ilang kaparyentehan ug kahigalaan. Way mga patayng lawas nga gipanglubong ni mga patayng lawas nga nanglutaw sa kadagatan.
Di katoohan nga kamao nag black magic ang mga vigilantes nga makapawagtang morang aso sa suspitsadong mga kriminal nga ilang gihipos. Maong nitumaw ang mas makahahadlok nga sitwasyon: Nga ang mga vigilantes nihiwa-hiwa sa patayng sa ilang mga biktima, gilabay ngadto sa kalaworan ug gisawo sa gutom nga dagkong mga isda.
Kay wa man magtagad ang kapolisan pagsusi unsay tinuod nga nahitabo, giurom nang mabuot nga mga molupyo sa Davao sa kahigayonan nga ang vigilantes di na matagbaw sa baho sa pulbora sa ilang pagpamusil nga kinahanglan nang bas-on ang ilang mga kamot sa lab-as ug init pang dugo sa mga biktima.
-o0o-
Kon nahimo kang biktima sa krimen, o kon may kadugo o kaila kang natulisan, nailad o nakawatan, di tika mabasol kon moabiba kada hagba sa gidudahang mga kriminal. Labaw nang di kong kalalis nimo kon mopakpak sa pangangkon ni Cebu City Mayor Tomas Osmena nga nitidlom og 30% ang kriminalidad sa Syudad sa Sugbo karong tuiga (ambot giapil ba niyag ihap ang 102 ka laktod nga pagpamatay nga napatong sa naandang tulis ug kawat sa mga kriminal).
Gawas pa, ang kapolisan wa madungog sa ilang kaligdong pag-rekord og krimen. Daghan nang nasakpan nga wa mo-blotter sa mga alarma aron motidlom ang crime volume ug nagmaniobra sa mga numero aron mosakang crime solution efficiency.
Ang mas maayong sukdanan mao ang pagpangutana sa imong kaugalingon kon mas luwas na ba karon ang imong kinabuhi ug kabtangan 11 ka buwan human nagsugod pagpanghasi ang mga vigilantes? [30] leo_lastimosa@abs-cbn.com
No comments:
Post a Comment