Arangkada for April 11, 2007

SI NOY MAGNO

Kon track record lay basehan sa pagpili og mayor sa Mandaue, pilde na silang Ading Seno, Jonas Cortes ug Jonkie Ouano. Kon ang kadagko sa mga natampo sa Mandaue ang sukaranan sa pagpili, way makapugong sa naglawig nga kadaogan ni Atty. Magno Dionson. Sa talagsaong lakang nga napakyas pagdapit sa pagtagad sa mabuot nga mga Mandauehanon, giasoy ni Dionson ang iyang pakiggubat sa mga Hapones sa ikaduhang gubat sa kalibotan hangtod sa iyang pagtabang paghimong dakbayan sa Mandaue.

Ang daotang balita alang ni Dionson mao nga di indigay sa kaligdong ang piniliay. Ang kuwarta ug makinarya, labaw sa iyang matinud-anong pag-alagad, gikahadlokang mao gihapoy manghawod karong Mayo 14.

-o0o-

Makiangayon man lang tingali nga akong kutluon ang pipila lang sa mga nahimo ni Dionson:

· Kuyog siya sa Amerikanhong mga sundawo pagtakas sa kabaybayonan sa Talisay niadtong Marso 26, 1945 aron pagpalingkawas sa Sugbo gikan sa mga Hapon ug nasamdan sa gubat sa Gumbang, Tabuelan niadtong abril 27 sa samang tuig;

· Human sa gubat, nanrabaho sa Cebu Royal Plant (karon San Miguel Corp.) sa adlawan ug nagtungha magabii;

· Konsehal sa Mandaue sud sa 32 ka tuig (1963-1995) ug nakatabang ni anhing Mayor Demetrio "Boy" Cortes paghimong dakbayan sa Mandaue atubangan sa kusganong pagbabag sa pundok ni kanhi mayor Alfredo "Pedong" Ouano;

· Gipasidunggan sa Integrated Bar of the Philippines sa ligdong nga pagpanlaban sukad sa iyang pagpasar sa Bar niadtong 1956; ug

· Gipasidunggan isip Parents of the Year niadtong 1978 uban sa iyang asawang si Jacinta (Tintay) Cortes ug sa siyam nila ka anak ug 16 ka apo.

-o0o-

Gihagit ni Dionson ang ubang mga kandidato sa paghikyad sab sa ilang qualifications aron makatarung pagpili ang mga Mandauehanon. Nahadlok kong di sama kadalayegon ang mga nahimo sa iyang mga kaatbang:

· Mangangkon si Jonkie nga apo siyang Pedong (ambot hisgutan pa bang iyang amahan nga nasuspenso tungod sa 12 ^th Asean Summit Scandal);

· Makapangangkon si Ading nga anak siyang Matoy ug nakatabang pag-umol sa mga programang napahimuslan sa mga Mandauehanon (absent siya o wa katingog sa pagpasar sa gahin sa merkado ug ubang nabulilyasong mga proyekto); ug

· Si Jonas makapangangkon nga anak ni Boy ug mosunod ni Ading panghunaw sa lubog nang tubig sa kapakyas pagbaraw sa mga transaksiyon nga gidudahang nagwaldas sa buhis sa mga Mandauehanon.

-o0o-

Ang bugtong isyu batok ni Dionson maong iyang pangedaron (84), nga angay siyang mohatag higayon sa batan-ong mga lider. Apan kon ang mga batan-on di sama kamasaaron, kinsay makabasol niya pagtanyag, sa makausa pa, sa luya na niyang mga bukton pagsapnay sa napukan niyang dakbayan?

Di angayng tulisukon si Dionson sa iyang pagdagan bisan way kahigayonan pagdaog. Angayng manubag ang mga nagsunod nganong gipakyas ang ilang maayong nasugdan. [30] leo_lastimosa@abs-cbn.com