Arangkada for April 12, 2007

DUWA SA YAWA?

Kon makigsulti ka sa mabuot nga mga lungsoranon, kinsa way gihimong daotan, wa kaapil pagtulis sa atong panudlanan ni pagpanamastamas sa atong kadungganan, ug kansang tinguha mao lang gyod ang kaayuhan sa nasud, ang ilang mga pamahayag makahatag nimo og abunda nga masulub-ong mga tilimad-on sa kalawom na gyod diay sa atong nahagsaan:

· Kay dako man ang kahigayonan nga wa nay kandidatong mahibilin kon hingpit ug matinud-anong ipatuman ang tanang lagda sa ligdong ug makiangayong piniliay, lingiw-lingiwan na lang nato ang ilang kalapasan, o usbon na lang gyong mga lagda;

· Di ta angayng mangita og mga anghel sa mga nanagan sa nagkalainlaing katungdanan kay kuyaw kon wa kay bisan usa ka ngan nga ikasuwat sa balota unya sa Mayo 14; ug

· Tungod sa kahugaw sa politika, ang tanang nangapil duna gyoy nahimong mga kahiwian busa ang atong pilion mao na lang kadtong di pa kaayo tag-as og sungay.

-o0o-

Mahimong nangapaso lang sila sa nangaging mga piniliay. Apan wa pa hingpit motahan sa gipangindahay nilang kausaban human sa sunod nga piniliay. Igo lang gipaubos ang ilang panglantaw. Kay di man gyod kaha mabanhaw ang paraiso dinhi sa yuta, mosugot na lang sila og impiyerno, basta nga di lang kaayo init, timawa ug madaugdaugon.

Inay hingpit nang mosalikway sa piniliay nga sa makadaghang higayon nihikaw sa ilang gitinguha nga mas maayong ugma, padayon silang namasin nga human sa sunod nga piniliay, bisan dominahan lang gihapon sa mga botanteng gutom, burong ug namahala na lang, ang mga makadaog ug makalingkod sa katungdanan di na sama kapating, katig-a, kakurakot ug kamapahimuslanon.

Wa na sila maglaom og milagro, bisan nagpabilin nang dakong bahin sa ilang tim-os nga mga pangaliya. Ang ila na lang gipanghinaot mao nga di na lang hutdon pagkumkom ang katigayonan sa nasud ug madugangan bisan dyutay na lang ang mga mumho nga mamisik ngadto sa kinabag-an nga, human sa way kinutobang mga pasalig ug pangangkon sa kalamboan, padayong gipanggutom.

-o0o-

Apan di tinuod nga ang politika duwa sa yawa. Mahitabo lang ni kon ang mabuot nga katawhan di magpakabana. Di tinuod nga ang mga nagpapili pulos sungayan ug ikogan. Dunay nanagan nga kasaligan apan wa nato hatagi og higayon kay nahiloan nang atong panghunahuna nga, kay wa man silay kuwarta ni kahigal sa pagpanikas, wa silay kahigayonan sa pagdaog.

Di hinuon ta hingpit nga matulisok. Gilumsan ta sa bombardiyo sa pamakak nga ang kamaayong tawo di garantiya sa maayong pangagamhanan ug nga mas kasaligan ang mga maru, nga mat-an pa sa pinya, kay mas isog silang mobarug alang nato. Bahala na kon ang samang kamaru mao say gigamit paglimas sa atong panudlanan.

Ang maayong balita: Di pa uwahi ang tanan. [30] leo_lastimosa@abs-cbn