UTOK SA YAGAW
Unsa may nasud sa bakukang sa mga polis sa Quezon City? Nga bisan, o tungod ba, sa daghang mga sakop sa media ug mga kamera ila mang gibunlot ug gipugos ang mga katabang ni Ted Failon ug ang mga kabanay sa iyang asawa tungod lang sa pasangil nga ilang giguba ang mga ebidensiya sa insidente nga wa pa nila kapamatud-i usa ba ka krimen?
Nibawos ba alang sa ilang kaubanan nga nabulilyaso human gibisto ni Ted ug sa ABS-CBN News ang pagpamusil sa gidudahang carnappers bisan nadakpan ug di nang kasukol? O gisugo sa ilang kadagkoan aron pagpasidaan sa tanang hingtungdan nga di maayong banggaon ang kapolisan?
-o0o-
Gisuspenso na ang upat ka mga sakop sa Quezon City Police District (QCPD) nga nakit-an sa footage sa ABS-CBN nga nanghasi ug nisikop sa mga igsuon ni Trina Etong: Silang Senior Inspector Rorberto Razon, Senior Police Officer 3 Jose Fernandez, Police Officer 2 Andy Salonga ug Police Officer 2 Reno Riparip.
Wa maapil sa silot ang mga polis nga bagis sang nibunlot sa mga katabang gikan sa pinuy-anan ni Ted bisan sa pahinumdom sa ilang abogada nga nakigsulti pa siya nila, wa pay kasong napasaka ug wa pay warrant of arrest nga naluwatan. Wa sab matandog ang pangu sa mga imbestigador sa QCPD, Superintendent Franklin Mabanag, nga nabantang sa mga kamera uban sa naghuramentado niyang mga sakop.
-o0o-
May sukaranan ang kahadlok nga gipadayag sa mga Sugbuanon nga nakakita sa footage sa bangis nga dinakpanay: Kon nahimo ni sa mga polis atubangan sa daghang mga tawo, apil na sa mga sakop sa media, unsa pa kaha kagrabe sa ilang pangabuso kon way magtan-aw? Kon ila ning nahimo batok ni Ted, unsa man intawoy dag-anan sa "mas gagmay" nga mga magbubuhis?
Labaw pang may sukaranan ang ilang pangutana: Mao ba ni gipaingnan sa buhis nga ilang hinagoan? Ang pagsuhol ug pag-uniporme og mga irong buang?
-o0o-
Bisan nabantang ang way pupanaganang pagyatak sa QCPD sa tawhanong mga katungod nilang Ted, iyang mga katabang, ug sa mga kabanay ni Trina, nangiyugpos lang ang PNP ug ang Malakanyang. Diha na sila nipahinumdom sa mga polis pagtuman sa mga lagda dihang nisibaw na pag-ayong mga pagsaway sa law-ay nga pasundayag sa pag-abuso sa gahom.
Hiktin ba lang nga panghunahuna sa mga polis sa QCPD ang nakaingon ning wa kinahanglana nga komplikasyon sa nagpadayong pakisusi unsa gyoy tinuod nga nahitabo sud sa pinuy-anan nilang Ted ug Trina niadtong Miyerkoles sa buntag? O may mga puwersa, nga mas dagko kay sa QCPD, nga way kukaluoy nga niggamit sa mga way labot aron lang pagpadangat og sipa nga mensahe ngadto sa mas daghan, di lang ni Ted? [30] leo_lastimosa@abs-cbn.com
1 comment:
Motuo nagayud ko nga ang atong mga kapolisan hilabihan mohigugma sa di nila mga asawa. Daw naghuramentado ang mga taga QCPD ingon nga wala katulgi ang kaso sa asawa ni Ted. Kuwang nalang astang silingan ni Ted apilon pagsikop sa mga kanahan. Hinuon dili man ni ikahibulong diri sa Pilipinas nga kadaghanan sa atong mga pulis kutob ra sa pagpamusas, pagpanglamparo, ug pagpanapaw. Gani gisuwayan ko pagpangutana ang usa nako ka higala na pulis kung nahibaw ba siya anang Miranda Rights, dali ra kaayo nakasanong ang amaw nga nag-ingon “bisan unsaon mas lami gyud ang Mirenda kay sa Sprite!” Wa ko kapugong sa akong kaugalingon nadapugan gyud nako siya. Dungag pa ni PO1 “ Miranda Doctine is about the rights of the accused. Why ask the police? Ask the accused! Its his rights not mine!” May punto sab si Sir.
X x x
Dili nalang ta mag-apil-apil maylabot sa isyu nga nagpalibot sa kamatayon ni Trina Etong. Naghikog siya o sa wa ang importante nga mahimo na nga mag-uyab-uyab si Ted. Ang angayan hinuon nato nga tutukan mao ang gipakita nga kinaiya sa atong kapulisan nga walay kaikog nga nanghakop sa mga senina ug kwelyo nga naa pa intawoy sulod nga katabang niani. Obstruction of Justice lagi kuno. Ang balaod ni Marcos gi-minarcos pud pagpatuman sa mga gwapo. May unta nga kanang Obstruction of Justice ra ang nag-inusarang balaod sa Pilipinas! Unsaon nalang ang Bill of Rights? Magpabilin nalang ning Bill hangtod sa ikaduhang pagbalik?! Karon ra nituhop sa akoang galamhan ang kahulugan nianang gitawag nila nga Police Power sa Estado. Sa gibuhat nila ni Ted, sayon nalang kaayo sabton kung unsa ang Police Power.
Post a Comment