Pangandoy sa 2010
Atubangan sa paspas ug lapad nga paglambo sa teknolohiya sa komunikasyon, ang mosunod maoy akong gipangandoy nga mahitabo na gyod karong tuiga:
· Si Cebu City Mayor Tomas Osmena, sa sunod niyang medical checkup, mangaway di na pinaagi sa text messages ngadto sa iyang pinanggang reporters kon dili pinaagi na sa Skype (o YM, o MSN, o bisan unsang application nga tin-aw ug libre) nga ang newsrooms makakita ug makapangutana niya; ug
· Si Cebu Governor Gwen Garcia di na manglibreg paniudto sa mga manambong sa iyang press conference sa Kapitolyo, moatubang na lag webcam ug manubag sa pangutana sa reporters nga tua sa newsrooms naniudto ginamit ang ilang meal allowance.
-o0o-
Kay maglisod kog sabot nganong bisan sa kadaghan ug kasayon na sa mas bag-ong mga teknolohiya pagpahibawo sa katawhan, may mga opisyal pa sa kagamhanan ug pribadong mga kompaniya nga mopada sa ilang press releases pinaagi sa hanap nga fax ug hard copy nga gisud sa sobre. Angay silang mahibawo nga bisan ang email giisip na nga "so last season."
Hinaot nga karong tuiga si Kongresista Eduardo Gullas di na mag-email lang sa iyang press statements. Kay mga pamantalaan ray makapahimus. Mas malingaw ang mga estasyon sa radyo kon ilang masibya ang iyang tingog pinaagi sa voice mail. Mas ganahan pa gyong TV newscasts kon i-upload ang iyang mga pamahayag sa YouTube ug ang link ibutang sa iyang Facebook ug Twitter accounts.
-o0o-
Di hinuon sayon ang pag-aghat sa katawhan, apil nang mga politiko, sa pagbiya sa ilang naandan ug pagsuway sa bag-ong mga paagi sa komunikasyon. Napamatud-an ni sa among kampanya pagkumbinser sa mga tigpaminaw sa webcast sa DYAB Abante Bisaya (http://www.stickam.com/dyab1512) gikan sa nagkalainlaing kanasuran sa pagpabati sa ilang tingog pinaagi sa voice mail sa Google Talk.
Hangtod karon, pila na ka buwan human gilusad ang kampanya, maihap pa gihapon sa tudlo ang nisuway. Kasagaran kutob lang gihapon sa chat. Ang uban moggasto pa ganig dako pagpanawag sa among landlines.
-o0o-
Bisan ang among reporters nipilit gihapon sa ilang handheld radio ug cellular phones. Bisan nabantang na nila unsa kasayon ang bag-ong teknolohiya. Ni-report ko gikan sa Sky Patrol pinaagi sa Fring. Ni-komentaryo ko gikan sa Hong Kong pinaagi sa Skype. Si Dave Tumulak pay niggakos sa GTalk.
Upat ka buwan sa di pang Mayo, may igo pang panahon pagkumbinser sa katawhan nga mas makapanginlabot sila sa kampanya, mas makabantay sa piniliay ug mas kapanalipdan ang ilang mga boto kon i-tweet ang ilang mga paniid, i-upload sa FB o YouTube ang nakuhang mga ebidensiya sa kalapasan ug ipabuhagay ang ilang gibati, bisan pabor o supak nilang Osmena, Garcia ug Gullas, sa Skype (o YM, o MSN, o GTalk, o bisan unsang tin-aw ug libreng application). [30] leo_lastimosa@abs-cbn.comMarie von Ebner-Eschenbach - "Even a stopped clock is right twice a day."
No comments:
Post a Comment