Arangkada of Leo Lastimosa for December 11, 2011

Arroyo sa prisohan


Karong nakapahimutang na sa iyang bag-ong kuwarto sa Veterans Memorial Medical Center (VMMC), si kanhi presidente Gloria Arroyo inanay na tingaling nakaamgo nga piniriso na gyod siya.  Bisan wa siya ibalhog sa Southern Police District (SPD) headquarters, gilaksian na siya sa mga pribilihiyo nga iyang gipahimuslan sa nagpatuo pa nga labihan ka-masakiton sa St. Luke's Medical Center.

Di na siyang kaggamit sa iyang cellphone ug laptop nga may wifi.  Nga, sa mga nasuhito ni Arroyo, importante kaayo sa iyang inadlaw nga pakiglambigit sa iyang mga alyado.  Labi na gyod, ning niaging pila ka semana, sa iyang mga abogado ug mga tigpamaba.  Di na sang kapasud og mga sakop sa media nga iyang but-an unsay ipangutana ug unsay letratong kuhaon.

-o0o-

Kon simbako may pagduda pa si Arroyo nga di na siya ang magbuot sa iyang inadlaw nga kalihokan, giklaro sa kapolisan nga di na siyang kapatuyang sa iyang gibati:

• Gisalikway sa PNP ang tinguha ni Arroyo nga maggawas-gawas sa presidential suite aron magpainit (ambot nganong hingpit na lang gyong gikalimtan ni Arroyo nga silay nipasidaan nga may hulga sa iyang kinabuhi nga gi-anggaan nila og "Put the Little Girl to Sleep"; ug
• Gibalibaran sab sa PNP ang plano ni kanhi first gentleman Mike Arroyo nga mopuyo sab siya sa VMMC (may gikahadlokan ba ang bana ni Arroyo nga may laing moduaw niya?).

-o0o-

Karong naa na si Arroyo sa VMMC, nga gipanag-iya ug hingpit nga gikontrolar sa gobyerno:

• Mapugos na siya pagtambong sa sunod nga mga husay sa kasong electoral sabotage sa Pasay City Regional Trial Court ug uban pang mga kaso nga ipasaka batok niya (ug di nang kapili unsay iyang sakyan);
• Kon mangangkon nga nisakit og balik ang iyang liog o nga dunay bag-ong sakit nga motumaw, mahiling dayon siya sa mga doktor sa gobyerno nga makatug-an sa korte masakiton ba gyong tinuod o namakak na sab; ug
• Kon mapamatud-ang wa nay seryusong sakit, mabalhog na gyod siya sa tinuod nga prisohan.

-o0o-

Apil sa maproblema ning pagkabalhin nang Arroyo sa VMMC mao ang balimbing nga mga politiko, mga negosyante ug mga opisyal sa gobyerno nga sekreto untang moduaw niya kay mahadlok nga makit-an sa bag-ong mga nagtungkawo sa gahom nga nagpitik pa diayng ilang kasingkasing alang sa kanhi nila amo.  Lahi niadto sa St. Luke's, di na sila mahimong magkawatkawat lang og duaw ni Arroyo kon wa nag nagtan-aw.  Karon, kinahanglan nang ilista ni Arroyo kinsa ang iyang mga bisita ug unsang adlawa ug unsang orasa silang moduaw.
Padayong matanggong si Arroyo sa kinatibuk-ang husay sa iyang mga kaso nga pulos di kapiyansahan.  Gawas lang kon mapamatud-an nga huyang ang mga ebidensiya batok niya.  O, kon sa makausa pa, palayason na sab siyang Chief Justice Renato Corona.  [30]  leo_lastimosa@abs-cbn.com