Haskang lisora paglili sa mga transaksiyon sa Korte Suprema. Way kasayuran ang taga gawas giunsa paggasto ang ilang kuwarta. Matag higayon nga mosuway pagsusi ang Malakanyang ug ang Kongreso sa ilang mga transaksiyon, ang mga mahistrado modayon og bangil sa ilang "fiscal autonomy." Matag higayon nga dunay motumaw nga mga sugyot sa mas makiangayon nga pag-apud-apod sa ilang pundo, mo-insistir dayon ang labawng hukmanan nga managsama sila og gahom ug busa di angayng hilabtan sa laing duha ka sanga sa gobyerno.
Gisuwayan nilang Gibo Teodoro, Chiz Escudero ug kaubanan--dihang mga kongresista pa sila--pagsubay giunsa paggasto ang Judiciary Development Fund (JDF) atol sa pamunoan ni kanhi chief justice Hilario Davide Jr. Apan gibasura sa Korte Suprema ang ilang tinguha pag-impeach ni Davide.
-o0o-
Mao nga dihang gi-impeach sa House of Representatives si Chief Justice Renato Corona niadtong Disyembre sa niaging tuig, daghan ang naghinamhinam nga, sa kataposan, mahibaw-an na gyod ang mga transaksiyon sa Korte Suprema. Nga makiangayon lang. Kay di man mapasakaan og kaso ang mga mahistrado sa kasarangang mga hukmanan tungod sa ilang immunity. Mapatubag lang sila sa mga kaso sa impeachment.Pipila gani sa 188 ka kongresista nga nipirma sa impeachment ni Corona nipasabot nga nadapit ang ilang interes kay usa sa articles of impeachment nipasangil ni Corona sa paggamit sa JDF alang sa personal niyang katuyoan. Nagtuo sila nga ang Senado mopugos sa labawng hukmanan pagpasabot sa karaan nang kontrobersiya.
-o0o-
Nahugno hinuon ang mga nagpaabot sa pagkabutyag sa mga tinagoan sa labawng hukmanan dihang nikakak ang Senate Impeachment Court. Niduko ang senator-judges sa pagdili sa Korte Suprema sa pag-abli sa dollar accounts ni Corona. Ug nagdumili si Senate President Juan Ponce Enrile pagsupina sa mga mahistrado ug sa mga dokumento sa labawng hukmanan.Hingpit nga napawong ang ilang paglaom dihang nipagawas og resolusyon ang Korte Suprema niadtong Pebrero 14 nga nagdili sa mga mahistrado ug ubang mga kawani sa pag-atubang sa impeachment trial kon ang ilang itug-an nga kasayuran nahilambigit sa tinagoang mga tigom ug ubang kalihokan nga naapil sa "judicial privilege."
-o0o-
Mao ni hinungdan nga morag nag-piyesta ang tanang giuhaw sa mga tinagoan sa Korte Suprema dihang gilista sa usa sa mga saksi sa depensa ang tanang suholan ug allowances nga nadawat ni Corona sugod sa 2002 ngadto sa 2011. Sa labing unang higayon, nalilian sa publiko unsa diay kaabunda ang mga suholan ug benepisyo sa mga mahistrado.Ang kahinam pagsubay sa mga benepisyo ni Corona nalabwan lang sa interes sa publiko sa pagkabisto sa iyang statements of assets, liabilities and net worth (SALNs). Apan sama sa ilang pagkahugno sa SALNs, nga nakapatumaw og mas daghang pangutana kay sa tubag, ang listahan sa 27 ka allowances nakapasamot lang sa ilang pagduda, inay sa pagtahud, sa kaligdong sa pamunoan ni Corona. [30] leo_lastimosa@abs-cbn.com
No comments:
Post a Comment