Arangkada for May 21, 2005

LIWAT SA AMAHAN

Mga torotot sa Kapitolyo sa Sugbo nibalising na sa ilang pagpanalipod sa
paglaktaw ni Gobernador Gwen Garcia sa Sangguniang Panlalawigan (SP) sa
pagsud og mga transaksiyon. Nihunong na silag pangugat nga gi-repeal sa
Government Procurement Reform Act (GPRA) ang probisyon sa Local Government
Code (LGC) nga nagmando nga mangayog pagtugot sa SP ang gobernador sa di pa
mopirma og mga kontrata. Ug mao nay gikuwestiyon ang pag-awhag sa mayoriya
sa SP sa Ombudsman pasuspenso sa gobernador, inay mangayog katin-awan sa
regular nga korte.
Samang argumento magamit batok sa gobernador. Nganong nidiretso man siyag
laktaw sa SP�nga radikal kaayong pagbiya sa naandan�sa way pagkuha og
klarong hubad nagkasungi ba gyong GPRA ug LGC?
Pero si Gwen igo lang nisunod sa gisugdan sa iyang amahan, si kanhi
gobernador Pablo Garcia. Nga sa kadaghan og suod nga mga abogado, nisandig
sa opinyon sa Bids and Awards Committee (BAC), nga gitahasan pagsubasta og
mga proyekto di paghubad og mga balaod, aron magbuotbuot pagsud og mga
transaksiyon para sa probinsiya.
-o0o-
Di angayng motiyabaw si Koronel Vicente Loot nga politiko maoy responsable
nga gitangtang siya pagka hepe sa Cebu Provincial Police Office (CPPO).
Bisan klaro ang papel ni Kongresista Clavel Asas-Martinez sa iyang
gidangatan�kay gigaling mang Martinez si DILG Secretary Angelo Reyes sa
husay sa Commission on Appoinments sa pagkatudlo ni Loot sa CPPO�angayng
pahinumdoman si Loot nga politiko say responsable nga napahimutang siya sa
puwesto.
Si Loot nahibawo nga di siya qualified sa puwesto. Pero kay namugos man si
Gobernador Garcia, nga alyado sa politika sa iyang asawang si Mayor Ma.
Luisa Loot sa Daanbantayan, napugos ang PNP�nga klarong namolitika
sab�pagtudlo ni Loot. Pero kay naapiki man si Reyes sa pagkadugang sa isyu
ni Loot sa daghang kontrobersiya nga nakababag sa iyang confirmation,
namolitika sab siya pinaagi sa pagtangtang ni Loot.
-o0o-
Maoy kapalaran ni Loot nga mga politiko maoy nagdiktar sa iyang karera sa
PNP. Nga angay gyod untang makapa-insulto niya, kana kon may pagsalig pa si
Loot sa iyang katakos. Iyang kasuod sa mga politiko maoy gitumbok nga alas
sa iyang mga promosyon. Samtang pamolitika say hinungdan sa daghang mga
bulilyaso nga gihan-ok ngadto niya.
Di hinuon makiangayon kon iduhig si Loot sa pamolitika sa iyang asawa. Kay
di man niya kadiktahan ang kalihokan sa iyang asawang mas gamhanan pa kay
niya. Pero angayng ilubong ni Loot sa yuta ang iyang nawong�kon may uwaw pa
siya�kon tinuod ang pasangil nga namangka siyag duha ka suba:
 Gigamit ang iyang pagka polis pagpanalipod sa
politikanhong interes sa iyang asawa; ug
 Gigamit ang politikanhong mga koneksiyon sa iyang
asawa pagpalambo sa iyang ranggo sa PNP. [30]

Email: leo_lastimosa@abs-cbn.com

_________________________________________________________________
FREE pop-up blocking with the new MSN Toolbar - get it now!
http://toolbar.msn.click-url.com/go/onm00200415ave/direct/01/