Arangkada for May 28, 2005

HIGANTENG HIYOS

Kuwestiyonable ang pagpabilin sa puwesto sa duha ka sakop sa Central
Visayas wage board. Ang pag-apil nilang Romeo Escandor, kanhi direktor sa
National Economic Development Authority (Neda 7), ug Atty. Ferdinand Pepito,
kanhi abogado sa Associated Labor Unions (ALU), gikahadlokang makapalawgaw
sa desisyon sa wage board sa uminto sa suholan. Kay pulos sila natangtang
sa mga puwesto nga maoy nakapahimo nilang sakop sa board.
Si Escandor nahimong sakop sa board di tungod kay siyay labing utokan ug
labing suhito sa isyu sa suholan kon dili tungod sa iyang pagka direktor sa
Neda 7. Samtang si Pepito wa maila nga maoy kampeyon sa kawsa sa mga anak
sa singot pero siyay gituboy sa ALU isip ilang representante sa board. Sa
laktod, silang Escandor ug Pepito di kapangangkon nga nag-okupar sila sa
puwesto sa personal nilang kapasidad.
-o0o-
Si Escandor gitangtang sa Neda 7 tungod sa pasangil nga iyang
gipanamastamasan ang iyang mga kawaning babaye. Kaingon nakog gisuspenso
pero kasaligang tinubdan nagbutyag nga gibalhin ra diay sa Manila.
Suspendido man o dili, gipulihan na siya sa Neda 7. Sa pikas bahin, si
Pepito dugay rang ni-resign ug ang ALU duna nay gi-nominate nga ipuli niya.
Pero pulos may alas silang Escandor ug Pepito: Pulos sila tinudlo ni
Presidente Gloria Macapagal-Arroyo. Ang napuli ni Escandor sa Neda 7 ug ang
bag-ong nominee sa ALU wa pa matudlo sa presidente. Maong, bisan pulos na
sila kolorum, padayong nagtungkawo silang Escandor ug Pepito sa importanteng
tahas pagtakda sa suholan sa mga trabahante sa tibuok rehiyon.
-o0o-
Mahimong makalusot silang Escandor ug Pepito. Manghinaot hinuon kong
gitun-an pag-ayo sa mga abogado sa wage board una gipalingkod ang duha kay
di makiangayon nga mosamot kalangay ang pagpahimus sa mga trabahante sa
nihit-nang-daan nga uminto sa suholan tungod lang sa kamapangahason sa duha
nila ka kuwestiyonableng mga sakop.
Di sab kapugngan ang mga pangutana: Syaro sab silang Escandor ug Pepito
kon wa dutli sa uwaw? Di man tingali sila posasan kon niboluntaryo pa
pagtahan sa puwesto? Ug kon sinsero si Presidente Arroyo pagtabang sa mga
mamumuo, nganong gipasagdan mang duha niya ka tinudlo sa padayong pagtambong
para sa mga sektor nga wa na nila representahi?
-o0o-
Basaha ni ug hilak, ang tinuod nga istorya nganong nahilis ang P78 nga
petisyon sa ALU ngadto sa P15 nga naaprobahan sa wage board:
 P25 ang girekomendar sa technical working group sa
board;
 P30 ang giduso sa labor (gibasura dayon sa botong
4-2);
 P22 ang sunod nga giduso sa labor (gibasura
gihapon);
 P12 ang tanyag sa management;
 P15 nga sugyot ni board chairman Rodolfo Sabulao
maoy naaprobahan ug P12 ra sa gawas sa Metro Cebu. [30]

Email: leo_lastimosa@abs-cbn.com

_________________________________________________________________
Express yourself instantly with MSN Messenger! Download today it's FREE!
http://messenger.msn.click-url.com/go/onm00200471ave/direct/01/