SAMOT OG SILAOB
Karong nipadayag nang Estados Unidos sa ilang hingpit nga suporta ngadto ni Presidente Gloria Macapagal-Arroyo, makaginhawa na bag luag ang administrasyon? Karong nideklarar nang US nga di seryuso ang lab-as nga mga hulga sa kudeta batok niya, nakalingkawas na ba sa usa sa iyang labing grabeng krisis si Presidente Arroyo?
Depende. Kon ang US maoy utok sa audio recording, mahimong nagpasabot ni nga bisan sa mga ebidensiya nga ilang gihuptan, di pa sila andam nga mosuporta sa kalihokan pagpalagpot ni Arroyo sa Malakanyang. O mahimong gihatag na sa presidente ang ilang gipangayo.
Pero kon way labot ang US sa expose, way garantiya nga magpabilin ang suporta kon motumaw ang dugang mga ebidensiya nga mopiit sa administrasyon sa mosunod nga mga adlaw.
-o0o-
Ang pag-angkon ni kanhi NBI Deputy Director Samuel Ong naa niyang orihinal nga kopya sa audio recording sa giingong tingog nilang Presidente Arroyo, First Gentleman Mike Arroyo, kanhi senador Robert Barbers ug Comelec Commissioner Virgilio Garcillano maoy nisegurong di pa mahilom ang kontrobersiya. Ang pagbisto ni Ong nga opisyal sa Intelligence Service of the Armed Forces (ISAFP) ang naghatag sa recording makapasamot sa pagsilaob sa eskandalo.
Sa samang higayon, mosamot inay mapapas ang pagduda sa publiko sa kamatinud-anon sa administrasyon tungod sa pasidaan ni Justice Secretary Raul Gonzalez pagkiha sa media organizations nga mopabati ug mopatik sa transcript sa recording. Pero maglisod pagmatuod si Gonzalez sa krimen. Kay hangtod karon wa pay complainant.
Sa ato pa, kinahanglang moangkon silang Presidente Arroyo ug kaubanan nga nabiktima sila sa wiretapping una makapasaka og kaso si Gonzalez.
-o0o-
Ang web log sa Philippine Center for Investigative Journalism (www.pcij.org/blog/) maoy labing adunahang tinubdan sa kasayuran parte sa recording. Gawas nga gipatik nila ang 18 ka pahina nga transcript sa tulo ka oras ug tulo ka CDs nga recording, gibahin nilang recording sa walo ka buwag nga MP3 files aron sayon nga ma-download sa publiko.
Kon gusto sa administrasyon nga pugngan ang katawhan pagpaminaw sa recording, kinahanglan nilang papason ang kaliboan ka MP3 files nga naa na sa hard disk sa personal computers, laptops ug MP3 players sa nagpakabana nga mga lungsoranon.
-o0o-
Lahi ang hubad ni Capitol Legal Consultant Pablo John Garcia sa kabahin sa recording parte sa proklamasyon ni Gobernador Gwendolyn Garcia. Matod niya ang gisulti sa wa mailhing lalaki nga "Pare kung anong konsiderasyon pare ha, paki-declare si Garcia ha, tinanggal siya eh ," nagpasabot nga si kanhi kongresista Celestino Martinez Jr. ang nagmaniobra paglangay sa proklamasyon.
Atol sa Kapamilya Media Forum sa DYAB Abante Bisaya ug SkyCable, nagdumili pag-angkon si Garcia nga silay nanuburno sa sulti sa samang lalaki nga, "Basta't may sinabi naman nya kung ano raw ang konting pang for disposal na, basta. " [30] leo_lastimosa@abs-cbn.com
No comments:
Post a Comment