Arangkada for June 21, 2005

 

                       PRUYBA SA TIKAS

 

Dugang ebidensiya nga di minao-mao ang audio recording sa giingong istorya nilang Presidente Gloria Macapagal-Arroyo ug kanhi Commission on Elections (Comelec) commissioner Virgilio Garcillano pagtikas sa eleksiyon sa niaging tuig: Gipanangtang ang tanang mga opisyal sa Comelec nga nahisgutan sa recording gikan sa pagduma sa umaabot nga eleksiyon sa Autonomous Region in Muslim Mindanao (ARMM). Si Comelec Chairman Benjamin Abalos nipatawag sa mga opisyal sa Comelec sa ARMM aron pagseguro nga wa silay dapigan atol sa eleksiyon unya sa Agosto 8.

Ang mas klarong ebidensiya gibisto sa Philippine Center for Investigative Journalism (PCIJ). Sa artikulo ni Yvonne Chua nga nigawas sa ilang web log (

http://www.pcij.org/blog) gahapon, gitaho sa PCIJ nga nitakdo ang mga pasalig ni Garcillano ngadto sa presidente atol sa giingong tulo sa 10 nila ka panag-istorya sa telepono sa gibutyag ni National Citizens Movement for Free Elections (Namfrel) Provincial Chairman Abdullah Dalidig sa Lanao del Sur nga labing grabeng kaso sa "dagdag-bawas" sa tibuok nasud.

-o0o-

Ang angayng pasidunggan nga wa hingpit malubong sa kangitngit ang katawhan sa labing grabeng krisis sa administrasyon ni Presidente Arroyo, labi na dihang gigapos sa Malakanyang ug sa National Telecommunications Commission (NTC) ang tradisyonal nga media organizations pagsibya sa audio recording ug pagpatik sa kinatibuk-ang transcript ini, mao ang PCIJ ug ubang websites kansang kaisog ug kaligdong nahimong iwag sa publiko nga gihikawan sa ilang lehitimong katungod sa pagpakisayod.

Ang gobyerno, labi na si Justice Secetary Raul Gonzalez, nga maoy nahimong berdugo sa pagpanghasi, way nahimo sa pagpahilom sa progresibong websites kay di man nila mahimong tak-opan ang Internet. Ang liderato sa PCIJ gipunit sa TxtPower (

http://www.txtpower.org) nga maoy nitanyag sa libreng download sa nagkalainlaing bersiyon sa popular nga "Hello Garci" ring tones.

Ang kalamposan sa PCIJ, TxtPower ug ubang websites klarong maoy nakapugos sa Malakanyang ug NTC pagbalitok ug pag-uyon na lang nga isibya sa kinatibuk-an ang kontrobersiyal nga recording.

-o0o-

Way sukaranan ang mga tambag ngadtong Presidente Arroyo nga iyang sundon si kanhi presidente Bill Clinton sa Estados Unidos kinsa nakalikay sa impeachment pinaagi sa pag-angkon sa iyang sala ug pagpangayo og pasaylo sa katawhan. Ang atraso ni Clinton nga napamatud-an sa mga imbestigador nga gipangulohan ni Kenneth Star mao ra ang iyang pakighilawas ni Monica Lewinsky sa Oval Office sa White House samtang ang pasangil batok ni Presidente Arroyo mao nga iyang gitikas ang eleksiyon sa niaging tuig.

Si Clinton nasakpang nagbudhi sa iyang asawa, si karon Senador Hillary Clinton; samtang si Presidente Arroyo gitumbok nga nangawat sa mandato sa katawhan. Ang atraso ni Clinton maisip nga depekto sa kaligdong, samtang ang pasangil batok ni Arroyo, kon mapamatud-an, makahimo niyang di haom sa labing taas nga puwesto sa nasud. [30]  leo_lastimosa@abs-cbn.com