Arangkada for June 22, 2005

 

              KONTES SA TIKAS

 

Duna koy email nga nadawat gikan ni Ma. Melanio S. <

ma.ms@ibank.com.ph> nga nitubag sa mga pagduda nga nanikas si Presidente Gloria Macapagal-Arroyo sa niaging eleksiyon base sa audio recording sa giingong panag-istorya nilang kanhi Comelec Commissioner Virgilio Garcillano:

"Leo, angay kalimtan ang isyu batok kang PGMA.  Ang paghatag gibug-aton niini magpakita lang sa atong kataphaw ug ka dili makadawat ug kapildihan.  Mao kini ang akong mga argomento:

"Sa unang pagkapili ni George W. Bush isip pangulo sa Estados Unidos, gilandungan kini sa dag-om sa pagduda nga gitikas niya (pinaagi sa iyang igsoon) ang eleksiyon.  Apan human siya naproklamar, gikalimtan sa kadaghanan ang mao nga isyu.  Hangtod karon pangulo si Bush ug hangtod karon wa nahuyang ang demokrasya ug ekonomiya sa Estados Unidos.

"Gisulong usab ni Bush ang Iraq ubos sa pasangil nga kini adunay mga weapons of mass destruction (wmd).  Misupak ang Santo Papa, Francia, hasta United Nations.  Paglabay sa panahon, namatud-an nga dili tinuod ang pasangil ni Bush.  Apan kinsa man ang nagkatawa karon?  Ang Estados Unidos.

"Samtang kita nagpadayon ug singgit nga manaog si Gloria.  Ang ato lang basihanan mao ang usa ka ibidinsya nga iligal, wa pa nasusi ang pagkatinuod, ug wala nagmatuod nga nanikas si Gloria.  Kini tungod kay kita'ng mga Pilipino dili makadawat ug kapildihan.  Kitang mga Pilipino ganahan kayo motuki sa taphaw nga mga butang.

"Sumala kato'ng salida nga Ang Unang Buwan.  Kapin sa bulan naglantugi ang mga tawo ngano'ng wa kini napili nga best picture.  Ngani, gikiha pa ni Caesar Montano ang mga tigpasi-ugda.  Apan nilambo ba ang industriya sa pamilikula?  Wala.

"Bisan sa basketbol, ganahan ta'ng moprotesta.  Ang labing reklamador ug nangulata sa mga referee atong giila nga "living legend".  Gipili pa nato nga senador.  Apan milambo ba ang basketbol sa Pilipinas?  Wala.  Hinunoa nikunhod pa.

"Magpadayon ba kita nga ingon niini?  Imbis mosyagit ta nga ilisan si Gloria, ngano'ng  di nato ilisan ang atong batasan sa pagkataphaw ug dili makadawat sa kapildihan?"

-o0o-

Daghang salamat sa imong email. Mao nay akong tan-aw sa mga nisiyagit og tikas sa niaging eleksiyon hangtod nga nakabati ko sa duha ka bersiyon sa audio recording nga unang gipagawas ni Press Secretary Ignacio Bunye. Ang kinatibuk-ang kalidad ug unod sa recording, nga gisundan sa wa magkadimaong reaksiyon sa Malakanyang, maoy nakapakumbinser nako nga direktang niapil si Presidente Arroyo pagmaniobra sa resulta sa eleksiyon.

Pasagdan ba lang natong iyang pagpanikas kay hugaw man gyong politika? Tuguting mangutana ko: Unsa may kapuslanan sa eleksiyon kon himoon lang ning kontes sa mga tikasan?

Mas importaneng pangutana: Unsaon mang Presidente Arroyo pagpangu sa nahibiling lima ka tuig sa iyang termino atubangan sa lapad nga pagduda nga kinawat ang iyang mandato? [30]

leo_lastimosa@abs-cbn.com