Arangkada for August 1, 2005

 

                CHAVIT O UDONG?

 

        Unsay sunod himoon ni kanhi gobernador Faustino Dy Jr. sa Isabela?   Mahimong laing Chavit Singson?  O sundon ang pagkakak ni Udong Mahusay.  Si Singson, nga karon nahibalik pagka gobernador sa Ilocos Sur. Maisugong nibarug pagbisto sa giingong pagdawat ni kanhi presidente Joseph Estrada sa minilyon ka pesos nga payola sa jueteng.  Samtang si Mahusay mao ang saksi sa Jose Pidal expose ni Senador Panfilo Lacson nga nibakwi sa iyang testimoniya human "giluwas" sa mga sakop sa Presidential Security Group nga gipangulohan ni Environment Secretary Mike Defensor.

        Si Dy gikatahong nakasaksi sa paghatag og tag P2 milyones gikan sa payola sa jueteng ngadto sa kada opisyal sa Comelec nga gitapok sa pinuy-anan ni Presidente Gloria Macapagal Arroyo sa La Vista, Quezon City sa wa pang eleksiyon sa Mayo sa niaging tuig.   Kon dasonan ni Dy ang pasangil, masaligon ang oposisyon nga matiwas nang administrasyong Arroyo.

-o0o-  

        Ang maayong balita parang Presidente Arroyo mao nga di moboluntaryo si Dy paghatag sa importanten niyang kasayuran.   Gani, gipanghimakak na sa mga paryente ni Dy ang pangangkon nga pamatud-an niya nga nitambong si Presidente Arroyo sa paghatag og suburno ngadto sa mga opisyal sa Comelec nga gitapok ni kanhi Commissioner Virgilio Garcillano.

        Pero ang daotang balita parang Presidente Arroyo mao nga duna say kasaligang mga tinubdan nga nipahibawo nga nipasidaan si Dy nga di siya mamakak kon ipatawag sa nagpadayong imbestigasyon sa mga komitiba sa Senado sa jueteng sa giingong kalambigitan sa mga Arroyo sa jueteng.  Labaw na kon mahinayon ang gikahinaman nga impeachment trial batok ni Presidente Arroyo.

        Maong di ikahibung ang mga taho nga naglumba ang mga representante sa Malakanyang ug sa oposisyon pagtultol sa nahimutangan ni Dy sa Estados Unidos aron kumbinsihon pagtabang sa nagkabangga nilang mga kawsa.

-o0o-

        Si Arsobispo Oscar Cruz, kinsa wa pa moangkon nga si Dy ang labing lig-ong saksi sa iyang expose sa jueteng, niangkon nga di lunsay ang motibo sa iyang sunod saksi.   Mga higala ni Dy niingon nga nasuko siya dihang nabisto sa Garci tape nga gisakripisyo sa Malakanyang ang iyang paningkamot pagpugong sa proklamasyon sa iyang kaatbang nga si Grace Padaca aron pagseguro nga di maapektahan ang mga boto sa presidente.

        Ang grabeng kasuko giingong maoy nakapugos ni Dy pagbisto sa iyang sekreto ngadto sa usa sa labing inilang lider sa oposisyon, si kanhi senador Vicente Sotto III dihang nagkakita sila sa Los Angeles niadtong Hunyo ning tuiga.  Si Sotto, nga wa igdungog nga maayong motago og sekreto, maoy gidudahang nipakatap sa kasayuran hangtod nga niabot sa atensiyon sa arsobispo.

        Laing kredito sa kaligdong sa kampanya ni Cruz:  Giingong giawhag niya si Dy pagpirma og affidavit sa wa pa motoo sa seryusong pasangil.   [30]  leo_lastimosa@abs-cbn.com