AFP DISTANSIYA NA
Si Kongresista Roilo Golez, ang labing unang sakop sa administrasyon nga niawhag ni Presidente Gloria Macapagal-Arroyo sa pag-resign, dunay talagsaong mensahe ngadto sa Armadong Kusog ug sa kapolisan: Ayaw mo pagpanghilabot sa nagpadayong krisis sa liderato sa nasud. Ang linya ni Golez sukwahi sa mensahe sa mga lider sa Edsa 1 ug 2 nga bukas nga nidasig sa kasundalohan ug kapolisan sa pagsuporta sa pakigbisog sa katawhan pagpalagpot sa administrasyon.
Mahimong igo lang nagsunod si Golez sa linya sa US ug sa dagkong mga negosyante nga ang bisan unsang kausaban sa nasudnong liderato kinahanglang ipasubay sa konstitusyon. O tingali masaligon siya nga mapugos sa oposisyon ug sa civil society groups si Presidente Arroyo pag-resign bisan kon di mosuporta sa ilang kawsa ang kasundalohan ug kapolisan.
-o0o-
Makahuloganon sab ang pagdeklarar ni AFP Chief Efren Abu, di lang kausa kon dili kaduha gyod, nga magpabilin silang neutral ug nga ang ilang ipatigbabaw mao ang konstitusyon. Napapas nang nahaunang pasalig ni Abu sa pag-ulbo sa kontrobersiya nga hingpit silang nagsuporta ni Presidente Arroyo.
Naatol ba lang o tinuyo gyod nga nagkatakdo ang bag-ong postura ni Abu ug ang pasidaan sa US batok sa radikal nga mga paagi pagpalagpot sa administrasyon? Unsa may implikasyon sa neutrality sa AFP: Nga di na sila mopagamit sa ilang kasundalohan ug armoured personnel carriers aron paghasi sa mga protesta batok sa administrasyon?
-o0o-
Gipamatud-an ni PNP Chief Arturo Lomibao nga mas lunod-patay siya para sa presidente. Wa siya maghisgot og neutrality, hinunoa nilab-as sa iyang hingpit nga suporta para ni Presidente Arroyo. Ambot bilib ba lang gyod sa presidente o nakumbinser nga ang iyang papel sa niaging eleksiyon, nga nabisto sa kontrobersiyal nga audio recording sa panag-istorya nilang Presidente Arroyo ug kanhi Comelec Commissioner Virgilio Garcillano, maoy garantiya nga bitayon siya sa sunod nga pamunoan.
Pero ang kapolisan ni Lomibao di na sama kalunod-patay. Wa na nila babagi ang kaliboan nga nagprotesta sa Makati. Ang maayong balita para sa Malakanyang mao nga ang mga demonstrador, kasagaran nila gidudahang hinakot ni Makati City Mayor Jejomar Binay, nagkatibuwaag dihang tingpanihapon na.
-o0o-
Ang pagtapok ni Presidente Arroyo sa mga politiko sa Malakanyang aron magsige lang gihapon og aleluya niya, nakapahinumdom nako sa kataposang mga adlaw sa diktadura ni kanhi presidente Ferdinand Marcos sa 1986.
Ang giisip nga kataposang lansang sa politikanhong lungon ni Presidente Arroyo mao ang gikahadlokan sa Malakanyang nga deklarasyon sa Catholic Bishops Conference of the Philippines (CBCP) pag-awhag sa presidente pagkanaog sa katungdanan. Ang tingog sa simbahan, kon modason sa awhag nilang kanhi presidente Corazon Aquino ug sa Makati Business Club, gipaabot nga maoy mopabaha sa minilyon ka katawhan sa kadalanan aron mapugos na gyod si Arroyo sa paglayas. [30] leo_lastimosa@abs-cbn.com
No comments:
Post a Comment