KINSAY MOPULI?
Sa akong pagsuwat ini, klaro nang mga tilimad-on nga mokanaog si Presidente Gloria Macapagal-Arroyo sa katungdanan. Nitingog na si kanhi presidente Corazon Aquino ug ang Makati Business Club ug ilang gidasonan ang nagkalapad nga awhag para sa iyang resignasyon. Apiki na kaayo siya bisan wa pa katingog ang Catholic Bishops Conference of the Philippines (CBCP) nga gikahadlokan sa Malakanyang nga moawhag sab niya pagpahawa sa Palasyo.
Ang nakapatakilid gyod sa administrasyon, nga maisugong nihulbot sa ilang kataposang baraha nga mao ang pagsaad og kausaban sa sistema nga nilamoy ug nakapadunot sa tanang mga politiko, mao ang pag-resign sa 10 ka mga sakop sa iyang gabinete—nga bisan minoriya ra pero maoy labing takos ug ligdong nga mga sakop sa iyang opisyal nga pamilya—bisan kon iya silang giminaruan pinaagi sa pag-una pagpangayo sa courtesy resignations sa tanang sakop sa gabinete.
-o0o-
Bisan sa tanang istorya sa iyang kalig-on, kaisog ug determinasyon, labi na nga napamatud-an sa kontrobersiyal nga audio recording sa panag-istorya nilang kanhi Comelec Commissioner Virgilio Garcillano nga di managana si Presidente Arroyo paglapas sa mga balaod kon maoy gikinahanglan pagpabilin sa gahom, wa ko magtoo nga makalahutay si Presidente Arroyo pagsukol ug pagpapating atubangan sa sibaw nga awhag sa iyang mga kaatbang nga karon gikuyogan na sa iyang mga kanhi dumadapig.
Nahibawo ang presidente nga di siyang kalahutay sa pagpaugat pagpahamtang sa iyang liderato ngadto sa katawhan nga nawad-an nag pagsalig ug pagtahud kaniya. Ang kinatibuk-an niyang kahanas sa politika gamiton sa pagseguro di lang sa iyang graceful exit kon dili, ug labaw na, sa pagpanagang nang daan nga di siya gukdon ug paninglan sa tanan niyang mga atraso sa mosunod nga pamunoan.
-o0o-
Nga mahitabo lang kon, sama sa Edsa 1 sa 1986 ug Edsa 2 sa 2001, kutob ra gihapon ta sa naandang pag-ilis sa mga personalidad. Sakto si Presidente Arroyo nga kinahanglang usbon ang sistema nga nilamoy ug sa ubang mga politiko nga sud na sa daghang katuigan nga nagbanusbanos paghupot sa gahom pero pulos napakyas pagtuman sa ilang gisaad nga kalamboan ug kaluwasan. Pero sayop siya nga kinahanglan siyang ipabilin sa katungdanan aron maoy moduma sa kausaban. Ang pagtangtang niya sa gahom maoy unang lakang nga gikinahanglan aron makasugod nang pag-usab sa dunot nga sistema.
Ang nakasubo kay bisan hapit na manamilit ang administrasyong Arroyo, wa pa magkauyon ang nagkalainlaing sektor kinsay mopuli. Si Bise Presidente Noli de Castro ba nga maoy gasto sa labing dagkong mga negosyante? Transitional government ba nga maoy gusto sa cause oriented groups? Civilian-military junta ba nga giduso ni Heneral Fortunato Abat? O lunsay nga military junta ba nga maoy gipasiatab ni Retired Colonel Billy Bibit ug sa junior officers nga iyang giangkon nga iyang gipangulohan? [30] leo_lastimosa@abs-cbn.com
No comments:
Post a Comment