Arangkada for July 20, 2005

 

GLORIA GINAPOS

 

Kon mangita mog klarong ebidensiya nga ginapos na si Presidente Gloria Macapagal-Arroyo sa iyang padayong pagduma sa nasud bisan sa sibaw nga awhag sa iyang resignasyon, di na kinahanglang motan-aw sa layo: Ang pagpabilin sa katungdanan sa Sugbuanong si Winston Garcia isip presidente ug general manager sa Government Service Insurance System (GSIS) maoy di malalis nga pruyba.

Ubos sa pagduma ni Garcia, ang GSIS gideklarar sa respondents sa usa ka nasudnong survey nga gihimo sa Social Weather Station (SWS) nga maoy labing kurakot nga ahensiya sa gobyerno. Sa labing unang higayon sa kasaysayan, naapsan sa GSIS ang gikaintapang kurakot nga mga ahensiya sama sa Bureau of Customs, Bureau of Internal Revenue ug Department of Public Works and Highways.

-o0o-

Wa magkuwang ang nagkalainlaing sektor sa pagtawag sa atensiyon ni Presidente Arroyo sa ilang nakit-ang mga eskandalo ni Garcia, nga nagsugod sa pagtiyabaw sa pobreng mga sakop sa GSIS batok sa iyang pagwaldas sa minilyon ka pesos pagpalit sa painting ni Juan Luna nga way bisan gamayng labot sa iyang ahensiya. Ang labing sibaw mao ang awhag sa iyang kaugalingong mga kawani sa GSIS kinsa nangisog pagprotesta aron pagbisto sa ilang gitumbok nga mga pangabuso ni Garcia sa iyang gahom.

Pero giisnab silang tanan ni Presidente Arroyo. Kinsa niinsistir nga dako ug konkreto ang kita sa GSIS ubos sa liderato ni Garcia. Samtang ang mga kaatbang ni Garcia way laing gitanyag gawas sa pagarpar.

-o0o-

Wa magkuwang ang mga ebidensiya sa giingong mga anomaliya ni Garcia sa GSIS. Si kanhi budget secretary Emilia Boncodin nibisto nga gisupak ni Garcia ang sugo ni Presidente Arroyo sa paglaslas sa dagkong suholan ug mga benepisyo sa mga opisyal sa mga korporasyon sa gobyerno. Giibanan man tuod ang iyang suweldo pero gibutang ra sab sa iyang personal bank account.

Dihang nabisto nga gawas sa pagpatrabaho ni Garcia sa iyang kaugalingong igsoon sa GSIS gihatagan pa gyod niya og makalilisang nga suholan ug mga benepisyo, naabtan pa si Presidente Arroyo og pipila ka buwan una nakaako sa pagtaktak sa laing abusadong sakop sa Pamilyang Garcia.

-o0o-

Daghan nang mas dagkong opisyal nga nangahas pagbaraw ni Garcia. Pero si Garcia ang kanunayng gipalabi sa presidente. Si kanhi finance secretary Isidro Camacho napugos pagbiya sa gabinete human gibasura sa Malakanyang ang iyang mga rekomendasyon pagtul-id sa gikuwestiyong pagduma ni Garcia sa GSIS.

Ang labing uwahing biktima sa kahawod ni Garcia maong mga sakop sa gabinete nga gipangulohan nilang kanhi finance secretary Cesar Purisima ug Boncodin nga nidemanda sab sa pagpalagpot ni Garcia. Natangtang silang tanan pero si Garcia nagpabilin.

Kon di kahilabot si Presidente Arroyo kang Garcia, unsa man intawoy iyang mahimo batok sa mas dagkong peste sa iyang administrasyon? [30]  leo_lastimosa@abs-cbn.com