Arangkada for July 3, 2005

 

                         PEOPLE POWER

 

            Ang linya karon sa mga propagandista sa Malakanyang, sa desperado nilang kampanya pagbungkag sa nagkalapad nga mga protesta pagpalagpot ni Presidente Gloria Macapagal-Arroyo sa katungdanan, mao ang pagkumbinser sa katawhan nga ilegal ang people power ug nga seguro ning moresulta sa duguong kaguliyang.

            Gibugoan na lang gyod sila sa katawhan.  Angay silang pahinumdoman nga labing menos duha ka presidente sa Pilipinas nakalingkod sa Malakanyang tungod sa people power:   Si kanhi presidente Corazon Aquino sa 1986 ug Presidente Arroyo sa 2001.  Ang legalidad sa ilang mga pamunoan giila ug gipatigbabaw sa Korte Suprema ug sa tanang kanasuran sa kalibotan.   Ug ang people power sa 1986 ug 2001 pulos malinawon.

-o0o-

            Wa ko mag-ingon nga kinahanglan nang mag-people power aron pagpalagpot ni Presidente Arroyo sa Malakanyang.   Mao ni ang kataposang kapilian.  Hangtod nga duna pay laing mga paagi paghingilin sa kuwestiyonableng liderato sa nasud—sama sa boluntaryong resignasyon sa presidente o impeachment pinaagi sa Kongreso—wa pa kinahanglana ang pagbaha sa minilyon ka mga tawo sa kadalanan.

            Pero kon magpa-pating gyod ang presidente ug isnabon ang nagsibaw nga awhag sa iyang resignasyon, ug kon gamiton ang iyang mayoriya sa House of Representatives ug sa Senado pagbaraw sa impeachment complaint nga nag-ung-ong batok niya, mahimong mapugos ang katawhan pagamit sa gahom nga gihatag nila sa konstitusyon:   Ang pag-alsa batok sa pamunoan nga wa na nila tahura ug saligi.

-o0o-

            Ang kapakyas sa mga grupo nga niawhag sa resignasyon sa presidente di sab angayng gamitong sukaranan sa pangangkon nga ang mayoriya sa katawhan padayong nisalig ug nisuporta sa administrasyon.   Labing uwahing survey sa SWS nagbutyag nga 59% sa mga nakabati sa audio recording sa giingong panag-istorya sa presidente ug kanhi Comelec commissioner Virgilio Garcillano nagtoo nga nanikas siya sa eleksiyon ug mas daghan ang wa nay pagsalig niya (-31%).

            Ang paglihok sa katawhan di mahitabo sa usa lang ka pamilok.   Naabtan ang katawhan og 24 anyos una nagkahiusa pagpukan sa diktadura ni kanhi presidente Ferdinand Marcos.  Naabtan silag tulo ka buwan human niulbo ang "juetengate" una napalagpot si Estrada.   Tulo pa ka semana human niulbo ang "Gloriagate."

-o0o-

            Ang labing klarong ebidensiya sa pagpanikas ni Marcos batok ni Cory Aquino sa snap election sa 1986 mao ang pangangkon ni kanhi defense minister (karon Senador) Juan Ponce Enrile dihang nag-rebelde silang kanhi AFP chief Fidel Ramos.   Ang labing klarong ebidensiya sa pangurakot ni Estrada mao ang pasangil nilang Chavit Singson ug Clarissa Ocampo.

            Ang ebidensiya sa giingong panikas ni Arroyo mao ang audio recording nga nag-detalye giunsa nila pagmaniobra ang resulta sa eleksiyon pinaagi sa pagamit sa election officers, PNP ug AFP.   Mahimong di madawat ang ebidensiya sa korte.  Pero maoy naghatag sa katawhan sa labing klarong ebidensiya giunsa sila pagprito sa ilang kaugalingong mantika.   [30]     leo_lastimosa@abs-cbn.com