Arangkada for July 2, 2005

 

                          HULGA SA BAHA

 

            Ang mga torotot ni Presidente Gloria Macapagal-Arroyo, nga natarantar sa nagkalapad nga awhag sa pagpalagpot sa ilang amo gikan sa katungdanan, nilubag sa pamahayag ni kanhi presidente Corazon Aquino ug nihubad ini isip suporta ngadtong Presidente Arroyo ug pagsalikway sa kampanya sa oposisyon pagpalayas niya sa Malakanyang.   Ang tinuod mao nga wa mausab ang mensahe ni Aquino:  Giawhag niyang katawhan sa pagpangaliya.

            Nga, kon sa ilang katarantar may panahon pang Malakanyang sa paghinuktok, angay silang maalarma.   Alyado sa presidente si Aquino pero wa ni moluwat og bisan unsang sulti pagsuporta sa administrasyon.  Atubangan sa pagsiyagit sa mga alyado sa presidente nga hingpit pang ilang suporta niya, nipili si Aquino sa pag-awhag og nasudnong pangaliya.

            Niay mas makahasol para sa presidente nga gipasanginlang nangawat sa iyang puwesto di kausa, kon dili kaduha:   Sukad sa pag-ulbo sa Gloriagate tulo ka semana nang nilabay, nakigsulti si Aquino ni Roces di kausa, kon dili kaduha.

-o0o-

            Ang mayoriya sa mga lider sa mga tinun-an sa Sugbo nga nitambong sa Kapamilya Media Forum sa DYAB Abante Bisaya ug SkyCable kusganong nidason sa awhag nga palagputon si Presidente Arroyo sa katungdanan di lang tungod sa nabistong pakig-istorya niya ni kanhi Comelec commissioner Virgilio Garcillano, nga ilang giisip nga ebidensiya sa iyang pagtikas sa niaging eleksiyon, kon dili tungod sa iyang kapakyas pagtuman sa iyang mga gimbuhaton:   Ang pagpalambo sa nasudnong ekonomiya ug paghatag sa labing batakang panginahanglan sa kinabag-an sa katawhan.

            Para sa mga batan-on, mas importante kay sa pagpili og lider nga makapuli ni Arroyo mao ang pagtuboy sa kolektibong liderato nga makiangayong magrepresentar sa tanang sektor sa katilingban ug pagpalambo sa panabot sa katawhan aron mahimo silang mas takos pagpili sa mga lider nga tinuod na gyong morepresentar ug moalagad sa nasudnong interes.

            Atubangan sa mga pagsaway nga way klarong kausaban sa nasud bisan human sa Edsa 1 ug 2, nipasabot sila nga di mahitabong kapoyan ang katawhan sa pag-ilis-ilis sa ilang mga lider hangtod nga makakita sila sa labing takos ug labing ligdong nga moserbisyo sa kinabag-an.

-o0o-

            Kon mag-uwan, mobaha gyod.  Mao ni nadiskubrehan ni Presidente Arroyo.   Ang sibaw nga pasangil nga kinawat ang iyang mandato ug peke ang iyang administrasyon gipaabot nga mas molanog pa tungod sa paglayat sa presyo sa mga palaliton ug serbisyo human sa pagpatuman sa iyang 10% nga expanded value added tax (EVAT).

            Nakalingkawas si kanhi US President Bill Clinton sa impeachment tungod sa pagtabon sa iyang relasyon sa babaye nga di niya asawa tungod sa makasaysayanon niyang kalamposan pagpalambo sa ekonomiya ug pagbalanse sa budget sa US. 

Si Presidente Arroyo wa katuman sa iyang trabaho.  Maong nameligro siyang maanod sa baha sa diskontento kon di mokanaog sa Palasyo.   [30]   leo_lastimosa@abs-cbn.com