Arangkada for July 31, 2005

 

              ILARA TITS

 

       Paglibog ug pagbuakbuak.  Kon wa pa mong kabantay, mao nay gihimo sa administrasyon ni Presidente Gloria Macapagal-Arroyo sa agresibong opensiba sa propaganda aron makutaw ug malasaw ang sibaw nga awhag pagpalagpot niya gikan sa Malakanyang.

       Tungod sa kadaghan sa mga politiko, mga negosyante ug mga sakop sa media nga napalit sa minilyon ka pesos nga pondo nga gipagawas sa Palasyo, di malalis ang kalamposan sa administrasyon.   Di lang ang kinabag-an sa katawhan kon dili hasta ang mga lider sa mga grupong nakigbatok sa presidente hingpit nang naglibog ug nabuakbuak.

-o0o-

       Nagsugod ang paugat sa administrasyon paglibog ug pagbuakbuak sa katawhan dihang ilang giunhan ang politikanhong oposisyon sa pagpagawas sa audio recording sa giingong panag-istorya nilang Presidente Arroyo ug kanhi Comelec Commissioner Virgilio Garcillano.   Gidasonan dayon ni sa hanap-pa-sa-diyes-panas nga pagpangayog pasaylo sa presidente.  Ug gisundan sa makalilisang nga pag-atake sa kakuwang og katakos ni Bise Presidente Noli de Castro ug sa ubang nangambisyon pagpuli niya.

·        Nanghinaot sila nga ang mga loyalista sa presidente padayong magduda sa katinuod sa Garci tapes; ug

·        Ang mga nakumbinser na nga gitikas gyod nilang Presidente Arroyo ug Garcillano ang niaging eleksiyon di kapatuyang pagtulisok sa presidente kay peligrong mas magkaguliyang ang nasud ubos sa pagduma ni bisan kinsang mopuli niya.

-o0o-

       Samtang wa pa kabawi gikan sa ilang pagkahugno ang mga grupong niawhag sa dinaliang resignasyon sa presidente, way tihiktihik nga gibombardiyohan sa Malakanyang ang nasud ug ang katawhan sa kaliboan ug usa ka lipatlipat nga ang tuyo mao ang, nakatag-an mo, paglibog ug pagbuakbuak:

·        Gipahibawo ang plano pagtukod sa Truth Commission agad sa sugyot sa Catholic Bishops Conference of the Philippines (CBCP), pero dihang wa mokubit ang mga obispo ug ubang gitanyagan way pupananghid nga gipadaplin ang sugyot pabor sa mas lab-as nga lipatlipat;

·        Ang iyang pagdeklarar atol sa SONA sa iyang suporta sa charter change pinaagi sa constituent assembly naputos sa daghang "tingali" sama sa perhaps ug maybe;

·        Iyang mga alyado sa politika, apil nang pipila sa iyang mga itoy dinhi sa Sugbo, klarong may pagtugot gikan niya sa pagpangampanya sab para sa constitutional convention;

·        Iyang alyadong mga gobernador sa ubang bahin sa nasud, nga puwerteng abiba para sa "Con-Ass" atol sa SONA nilusad sa ikatulong paagi pag-usab sa konstitusyon, ang "People's Initiative;" ug

·        Human sa makalilisang nga pakpak ni House Speaker Jose de Venecia sa pagsuporta sa presidente sa Cha-Cha, nga kuwang na lag dyutay nga mosaka siya sa lamesa sa House aron pag-abiba, gisabligan og bugnawng tubig sa presidente ang iyang kahigwaos nga mag-primero ministro pinaagi sa pagdeklarar tulo ka adlaw human sa SONA nga tiwason niyang iyang termino hangtod sa 2010.   [30]   leo_lastimosa@abs-cbn.com