Arangkada for August 26, 2005

 

            NAGDUKA O NAIKOG?

 

Kusganong gipanghimakak sa Department of Health ang pangangkon nga silay nagsugo sa Cebu City Health Department pagpamalit og kemikal batok sa dengue. Matod ni DOH 7 Director Susana Madarieta di mahitabong moawhag sila sa City Health pagpamalit og kemikal kay ang DOH agresibo man ganing nangampanya batok sa pagamit og kemikal ug fogging ug mist spray machines. Maoy baruganan sa DOH nga ang labing epektibong panagang sa dengue mao ang pagpanlimpiyo ug paguba sa mga tagoanan ug itloganan sa mga lamok.

Wa magkuwang ang DOH pagbalikbalik ug pagpasabot sa daotang epekto kon ang local government units padayong magsalig sa mga kemikal sa kampanya batok sa dengue. Pero ang mga sakop sa Cebu City Council, gawas nga nagpaugat sa pagpadayon pagpangompra sa mga kemikal, nitoo pa gyod sa pamakak nga niduhig sa DOH sa kuwestiyonableng transaksiyon.

-o0o-

Kinsa mang opisyal sa City Health ang nangilad sa Committee on Parks and Playground, Wildlife, Ecology and Environmental Management nga gipangulohan ni Konsehal Nestor Archival nga nangayo silag kemikal "through the instigation of the DOH to undertake anti-dengue spraying activities?" Si City Health Officer Fe Cabugao, si Environmental Division Chief Renette Christine Ligaray o si Konsehal Christopher Alix, ang tsirman sa Committee on Health?

Nganong nidiretso man sab og too ang komitiba ni Archival sa way pagpangutana sa DOH? Nga sa ilang committee report niadtong Pebrero 23 ning tuiga gikutlo man sab unta nilang sukwahi nga memorandum sa DOH niadtong 2002 nga ang pagpanlimpiyo gihapon ang nag-unang paagi pagsagang sa dengue? Nagpasulabi bang ilang kaikog ni Alix kay sa pagsusi sa gilawog nilang nagkasungi nga baruganan sa DOH?

-o0o-

Samang report nihisgot sa reklamo sa City Health nga nagnihit nang suplay sa aqua resigen kay nailisan ang main supplier sa kemikal, ang Bayer Environmental Science. Nganong magnihit mang suplay nga ang supplier ra may nailisan?

Gawas pa, nganong aqua resigen may gipangayo sa purchase request (PR) ni Cabugao ug sa resolusyon ni Alix nga brand name man kaha ni? Ug nganong nakaila mang City Health sa supplier, nabalaka na man gani nga nailisan na, nga sa paghimo sa PR ug sa resolusyon wa pa may subasta?

Di ba mas napanalipdan untang interes sa mga Sugbuanon kon ang mga konsehal niluwat pa ning yanong mga pangutana?

-o0o-

Ang gibisto ni DOH chief epidemiologist Eric Tayag nga mas daghang nangamatay sa dengue human sa fumigation sa Pag-asa, Quezon City angayng mokusi sa konsiyensiya sa mga politiko nga mas ganahang mosalida kay sa pagtabang sa mga molupyo.

Angayng manlipaghong sa kauwaw ang mga politiko sa pasidaan sa World Health Organization nga ang pagamit og kemikal gawas makapakumpiyansa sa katawhan, makalipat pa gyod nila sa mas epektibong panagang nga mao ang pagpanlimpiyo. [30]  leo_lastimosa@abs-cbn.com