DUWA RA DIAY?
Pero kuwangan pag 31 ka pirma una maabot ang 79 nga maoy gikinahanglan aron ma-transmit ang articles of impeachment ngadto sa Senado. Ug nagkanihit nang panahon. Mahimong di na gyong kapugngan ang pagbasura sa mayoriya sa kinalig-onang impeachment complaint sa pagpadayon sa deliberasyon sa House Justice Committee sunod semana.
-o0o-
Duna hinuoy mga tilimad-on nga ang politikanhong oposisyon di ingon ana kamakaluluoy. Ang makahuloganong pahiyom sa mga lider sa oposisyon ug ang pasumbingay sa mga alyado sa administrasyon nga mahimong di na gyod kapugngan ang paglusot sa kaso nakapalig-on sa pagduda nga bisan sa gipabaha nga mga haylo ug mga suburno ang mayoriya ni Presidente Arroyo di paigo sa pagbasura sa impeachment complaint.
Pun-an pa sa managkaluha nga pahibawo sa Nacionalista Party ni Senador Manuel Villar ug Liberal Party ni Senate President Franklin Drilon, nga giluwatan dihang ang administrasyon masaligong nideklarar nga naghingutas nang impeachment complaint, nga ang kapin sa 30 nila ka mga sakop mahimong mopirma na sa sunod semana.
-o0o-
Ang pahibawo ni Villar puno sa kahulogan. Hangtod karon alyado pa silang Presidente Arroyo. Pero mas suod silang Bise Presidente Noli de Castro. Maong ang iyang pagpangunay pagpahibawo nga di niya pugngan ang iyang mga sakop nga kongresista sa pagpirma sa impeachment complaint moambas sa kasipa sa pag-awhag ni Drilon niadtong Hulyo 8 sa resignasyon ni Presidente Arroyo.
Labi na nga ang bomba ni Villar wa mag-inusara. Giunhan ni sa pahibawo nga dunay luwatang importanteng deklarasyon si de Castro sunod semana. Nga nagsunod sa kalit lang pagbalitok ni Senador Joker Arroyo, laing suod nga alyado nilang Villar ug de Castro, nga ang pakigsabot ni Presidente Arroyo kang kanhi presidente Joseph Estrada klarong pamolitika.
-o0o-
Pero sa di pa purungpurongan og pasidungog ang oposisyon ug ang bag-o nilang mga alyado, basaha ni og hilak:
- Ang grupo ni Villar mahimong nanalipod lang sa ilang interes kay seguro man silang mawani kon magka-alyansa silang Erap ug Arroyo; samtang
- Ang politikanhong oposisyon mahimong sayon ra untang makatigom sa 79 ka pirma pero wa tinud-a kay kon makasugod dayon ang impeachment trial, ang mga senador nay bida, mawani nang mga kongresista.
Kon ang mga politiko sa pikas ug pikas igo lang diay nagpatas-anay og tinuboan, kinsa may mopatigbabaw sa interes sa kinabag-an? [30] leo_lastimosa@abs-cbn.com
1 comment:
sir maayong hapon, gusto onta me mag open sa among contribution sa sss pero dli na pareha sauna ka sayon so nag fill up me og form sa sss website para mka open me sa among contribution og loan, ang taga SSS ang mo provide sa among passwrd,ang problema kailangan og imong email add og employer ID. ok ra onta sir if email add ra kay pwede ra mn me mag pa buhat sa internet, but ang employer id onsa-on if dogay na nka honong og work atong papa den nkalimot na sya sa iyang employer ID so dli na sya mka check dri sa iyang contribution thru intenet kay osa mn ni sa requirmnts sa sss. den ako sir nag pa fill-up ko succesfull na daw mao ang ge send nga msge sa taga sss sa akoa. ila nko gtagan sa akng passwrd but pag try nko og log in INVALID mn dli mn dawaton akong passwrd. so useless ghapon to among g fill up... onsa-on mn ni namo sir leo. naa na onta me USER ID OG PASSWORD but dli mn ghapon namo magamit kay lagi INVALID. Then if mag fill up me og balik dli na dawaton sa SSS WEBSITE KAY ang among information nga gi fill up kay ALREADY REGISTERED na daw... onsa on mn ni namo sir dli nme mka log-in.
Post a Comment