GLO ANG UTOK
Si National Security Adviser Norberto Gonzales maoy nagkawot sa gahong nga iya karong nahimutangan. Siyay niangkon nga maoy nipirma sa gikuwestiyon nga kontrata tali sa Republika sa Pilipinas ug sa Venable LLP, ang law firm nga nagbase sa Washington nga gitahasan pagpangayo og kuwarta sa US Congress para sa charter change (cha-cha). Hambogero pa kaayong nipasalig nga way bisan usa ka dako sa kuwarta sa gobyerno nga nagasto kay pribadong mga donasyon ang gigamit sa transaksiyon.
Ambot wa pa ba kaha huwasi sa kalipay sa laktod nga pagbasura sa ilang alyadong mga kongresista sa impeachment complaint batok ni Pres. Arroyo, o nahubog ba lang sa paglampos sa administrasyon paglipat-lipat sa sibaw nga awhag pagpalagpot sa presidente, masaligon si Gonzales nga ang iyang mga pamahayag makabaraw sa mao pay pagsulbong nga eskandalo sa kontrata sa Venable LLP. Pero sipyat siya. Ang iyang kahambogero maoy nakapahagiyos sa labing lab-as nga bagyo batok sa naapiking administrasyon.
-o0o-
Dihang gisukitsukit na sa mga senador si Gonzales, diha pa siyang kaamgo (ug mao ni hinungdan nganong wa kalihok ang gamhanang makinarya sa propaganda sa Malakanyang pagsalbar sa lunod-patay nga batabata sa presidente) nga duna diay siyay kaliboan ug usa ka kasayuran nga di matug-an bisan ngadto sa suod nilang mga alyado sa Senado nga gikahadlokan sa presidente nga mopalagpot niya sa puwesto kon gitugotan pang maka-abante ang articles of impeachment gikan sa House of Representatives:
- Di siya mahimong mopiyait nga si Pres. Arroyo ang nagsugo niya pagsud sa transaksiyon (mahimong tungod kay naluoy siya sa iyang amo nga bag-o lang nakalingkawas sa labing seryusong krisis nga nihasmag sa administrasyon o gisugo gyod siya sa Malakanyang sa pagpamakak); ug
- Di sab mahimong iyang isuka kinsa ang pribadong mga grupo o mga indibiduwal nga tinubdan sa kuwartang ibayad sa Venable LLP (mahimong tungod kay maikog siya sa manggihatagon nilang mga alalay sa pribadong sektor, o di gyod tinuod nga pribadong pondo ang gigasto sa transaksiyon).
-o0o-
Bar topnotcher si Gonzales. Pero hingpit nga nilikoy atubangan sa mga senador. Nagusbat ang pangugat nga pagpalambo sa depensa ug pagpahiyos sa alkanse sa budget ang labing dagkong katuyoan sa kontrata sa Venable. Pero ang aktuwal nga kontrata nagpakita nga ang cha-cha maoy naa sa unang linya ug ikatulo rang depensa ug debt relief.
Nakawang sab ang pag-insistir ni Gonzales nga way labot sa kontrata si Pres. Arroyo. Ang pagpakanselar sa presidente sa kontrata maoy di malalis nga pruyba nga siyay utok sa transaksiyon. Kay wa man siyay gahom ni katungod pagpakanselar sa kontrata nga wa siyay labot.
Nakalingkawas si Gonzales sa priso sa Senado tungod sa sayon kaayong lusot sa alta presyon. Pero gidugangan niyang mga lansang sa lungon sa administrasyong way mandato. [30] leo_lastimosa@abs-cbn.com
No comments:
Post a Comment