Arangkada for September 6, 2005

 

            ALSA BATOK CSCST

 

Daghang kasayuran ang akong nadawat—pinaagi sa email, text, suwat, tawag sa telepono ug linawas nga pakigkita—pagdason sa mga pasangil sa anomaliya sa Cebu State College of Science and Technology (CSCST) main campus. Matod nila di ang main campus ray nabiktima kay hasta ang satellite colleges sa tibuok Sugbo giingong naputos sab sa daghang panguwarta ug nahimong mga tinubdan sa pekeng mga diploma.

Nanghinaot ko nga karong nasugdan na nilag pangisog pagbisto sa dugay nang gitan-ogan nga mga reklamo, tiwason na lang gyod sa mga kawani ug mga tinun-an sa CSCST ang kawsa sa paglimpiyo sa eskuylahan. Nanghinaot sab ko nga ang mga ahensiya nga ilang gidangpan—apil nang Visayas Ombudsman, Department of Budget and Management ug Commission on Audit—motinuod sab pag-imbestigar sa mga pasangil aron madasig ang uban pang mga biktima pagbarug sa ilang katungod.

-o0o-

Niang pipila lang sa kapid-an ka mga reklamo nga akong nadawat batok sa mga tagduma sa mga eskuylahan sa kinatibuk-ang sistema sa CSCST:

• Mga opisyal motanyag og mga kurso nga sila ray mga magtutudlo ug mga tinun-an, magdungan silag gradwar, dayong tak-opan ang kurso, magtanyag na sab og lain, nga sila ra gihapoy mga magtutudlo ug mga tinun-an, usahay magbalhin-balhin og gradwar sa nagkalainlaing eskuylahan aron di kaayo mabantayan;
• Inilang mga politiko sa Sugbo ug ubang bahin sa nasud nang-gradwar sa mga kurso bisan wa katungha bisan kausa, kasagaran mas dagko pa silag grado kay sa tinuod gyong mga tinun-an;
• Mga non-teaching personnel gi-suweldohan isip teaching assistants ug instructors aron lang masuweldohan sa trust fund ug malutsan ang pagdili sa DBM sa honorarium ug overtime pay;

-o0o-

• Gibayran ang mga opisyal baleg 100 ka oras bisan kon ang gitudloan nine units ra sa tibuok semestre;
• Mga opisyal namugos nga suweldohan sila sa pagpresentar ug pagpanalipod sa kaliboan ka thesis proposals bisan kon wa sila makatambong;
• Pipila ka opisyal nagpuyo sa mga eskuylahan sa way pagbayad sa abangan ug konsumo sa tubig ug kuryente;

-o0o-

• Dugay kaayong modugo ang administrasyon para sa chalk ug ubang batakang panginahanglan sa mga eskuylahan pero sayon rang mapagawas kon mamalit nag computers, aircon, LCD projectors ug cell phones para sa mga opisyal;
• Mga opisyal nitudlo sa ilang mga asawa, mga anak ug ubang mga kadugo sa sensitibong mga posisyon sa mga eskuylahan, usahay gituyo pag umol ang mga posisyon aron lang makasapi ang ilang mga pinalabi; ug
• May mga opisyal nga tagsa rang igkita sa ilang giduma nga mga eskuylahan, maong ang ilang mga kawani nga igo lang mo-punch-in sa ilang daily time cards sa bundy clock sa buntag pero mamauli sa ila ug hapon nang mamalik sa trabaho. [30]  leo_lastimosa@abs-cbn.com