HADLOK SA HUSAY
Human lumsi ang katawhang Pilipinhon sa propaganda sa administrasyon ni Presidente Gloria Macapagal-Arroyo nga huyang, minao-mao ug di kapamatud-an ang tanang testigo ug mga ebidensiya sa oposisyon batok sa presidente, gipalihok sa Malakanyang ang langit ug yuta aron nga di mahusay ang impeachment complaint batok ni Presidente Arroyo.
Human nipasalig nga andam si Presidente Arroyo nga manalipod sa iyang kaugalingon, kay ang iyang kaligdong ug katakos maoy makapa-absuwelto niya sa seryusong mga pasangil nga iyang gigamit ang payola sa jueteng pagtikas sa niaging eleksiyon, ang administrasyon nidangop sa tanang hugaw ug bastos nga mga maniobra aron nga mabasura ang kaso sa di pa kasugdan paghusay.
-o0o-
Dako ning tamparos sa mga grupo nga kusganong nisupak sa sibaw nga mga awhag para sa resignasyon ni Presidente Arroyo. Para nila pagpanglaktod ug di makiangayon para sa presidente nga mokanaog sa puwesto bisan wa pa kapamatud-i ang mga pasangil batok niya ug sa iyang pamilya. Niawhag sila nga hatagan ang presidente og higayon pagpanubag sa mga pasangil batok niya pinaagi sa impeachment process.
Unsa man karoy gibati ning mga grupoha sa makauuwaw nga salidang gipakita sa mga kongresistang sakop sa House Justice Committee, nga maoy gitugyanan paghimo sa pasiunang imbestigasyon sa impeachment complaint? Ang siniyagitay ba sa mga kongresista ug ang ilang pagsalida atubangan sa mga kamera ug mga mikropono ang ilang gipaabot sa solemneng proseso paghusay sa kaso batok sa presidente?
-o0o-
Ang mga torotot sa administrasyon niingon nga di ta angayng ma-eskandalo. Kay ang impeachment usa ka politikanhong proseso. Bisan sa tanan nilang pakauwaw, giawhag ta sa Palasyo nga padayong mosalig sa Kongreso nga makatuman sa ilang trabaho.
Kabahin ba sa proseso ang kinamangay sa mga kongresista, pagtanyag nilag kuwarta ug mga proyekto, pagtudlo sa ilang mga paryente sa dagkong puwesto sa gobyerno, paghudlat nga ibisto ang mga may gitagoang mga eskandalo, aron lang pagseguro nga di kaabot og 79 ang mopirma sa impeachment complaint nga maoy makapasutoy ini ngadto sa Senado?
-o0o-
Ako pabiling nisalig sa kaligdong sa kinabag-an sa katawhan. Naniid sila sa mga panghitabo uban ang dakong tinguha pagsusi unsa kalig-on ang mga testigo ug mga ebidensiya batok sa presidente. Kon maklaro nga di makiangayong luokon sa administrasyon ang oposisyon, ang katawhan di moduko pag-absuwelto sa presidente.
Usa sa mga timailhan asa kapusta ang katawhan: Si Kongresista Francis Escudero, ang House Minority Floor Leader, kansang pamilya itoy ni Erap ug ni Marcos, gihulagway na nga ligdong ug takos nga mahimong senador o bisan gani presidente. Samtang si DENR Secretary Mike Defensor, human sa labing dakong salida sa iyang kinabuhi sa iyang pagkuwestiyon sa kaligdong sa Garci tapes sa niaging semana, gihulagway nga umaabot nga announcer sa circus. [30] leo_lastimosa@abs-cbn.com
No comments:
Post a Comment