BILIB NI RAMA
Bisan di hingpit nga makapanghunaw sa mga bulilyaso sa mga sakop sa iyang giduma nga Cebu City Council, si Bise Mayor Michael Rama angayng pahalipayan sa iyang pagpangunay pagsusi sa mga pasangil nga gigamit ang konseho sa pagpalusot sa kuwestiyonableng mga transaksiyon sa pagpamalit og mga kemikal ug mga makina batok sa dengue bisan kon dugay na silang gitambagan nga di ni epektibo pagpatay sa mga lamok.
Si Rama makahimo unta pag-isnab sa mga sakop sa media nga nikuwestiyon sa kaligdong sa pipila nila ka mga lakang. Duna siyay igong gahom paglisudlisod ni bisan kinsang peryodista nga mangahas pagsusi sa mga dokumento sa konseho. Ang iyang kahinog sa politika nakahimo niyang takos pakig-away sa media ug paghulga sa mga sabaan nga namasangil og mga anomaliya pero way napresentar nga mga ebidensiya.
-o0o-
Pero gipili ni Rama ang pag-atubang sa mga pasangil. Human sa pasiunang pagdupa sa mga konsehal, iyang gipa-utingkay ang mga dokumento sa nangagi nilang mga sesyon nga nituki sa gikuwestiyon nga mga transaksiyon. Gustong pamatud-an ni Rama nga kon duna may mga konsehal nga nanguwarta sa ilang mga puwesto, wa nila magamit ang City Council. Nga ang pangurakot nahimo samtang nagtuman sila sa executive functions nga gisangon ni Cebu City Mayor Tomas Osmena, sama sa pagpangabogar og kadudahang mga transaksiyon bugti sa suburno o pahalipay sa makapabor nga mga negosyante.
Pero niangkon nang daan si Rama nga way garantiya nga napugngan nila ang tanang mga palusot nga mahimong gipasukip sa labing inosenteng mga resolusyon nga wa nila matarung sa pagtuki. Maong dalayegon ang iyang pagpangita inay paguba sa mga ebidensiya sa posibleng mga anomaliya sa iyang tugkaran.
-o0o-
Ang pasiunang nadiskubrehan ni Rama, samtang wa kamatuod sa mga pagduda sa panguwarta, makapanlipaghong sa kauwaw sa iyang kaubanan. Pananglitan nabuko ang pangangkon ni Konsehal Jack Jakosalem nga ang mist spray machines gikan sa Germany para sa agrikultura kay segun sa minutes sa konseho niangkon man siya dihang gipangutana ni kanhi konsehal Carmen Piramide kapin na sa usa ka tuig ang nilabay nga para sila sa dengue.
Nahibaw-an sang Rama nga ang mga konsehal nga nanghunaw ron sa kuwestiyonableng mga transaksiyon wa mokuwestiyon nilang Christopher Alix, Gerardo Carillo ug Jakosalem. Matod ni Rama kon nagtuman pa lang untang tanan sa ilang trabaho di unta moulbo ang kontrobersiya.
-o0o-
Nagpasalamat ko nga bisan sa pila ka tuig na nilang panag-uban, kay mangaon ug mag-inom man kada human sa sesyon, ug bisan wa masagoli og oposisyon, wa pa sila magkasabot pagtinabonay sa ilang mga baho.
Kontrabida na si Rama sa iyang kaubanang lain og sabaw. Pero madawat niyang pagdayeg sa kinabag-an sa mga konsehal nga nagbinut-an ug sa mga Sugbuanon nga nipahimutang nila sa katungdanan. [30] leo_lastimosa@abs-cbn.com
No comments:
Post a Comment