LISO ANG UTOK?
Unsa man intawoy nasud sa ulo ni Cebu City Health Officer Fe Cabugao? Nganong iya mang gibasura ang dugay na kaayong baruganan sa iyang upisina batok sa pagamit og mga kemikal batok sa dengue? Duna ba siyay nadiskubrehan nga magic chemical nga nakapaliso sa iyang utok? O naliso lang gyod ang iyang utok?
Si Dr. Cabugao nagpabiling tak-om atubangan sa sibaw nga kontrobersiya sa pagpangompra sa Syudad sa Sugbo og kemikal bisan sa tambag sa iyang upisina ug sa Department of Health nga di ni epektibo batok sa dengue. Pero sa pakisusi ni Ramil Ayuman sa TV Patrol Central Visayas sa Bids and Awards Committee, nabisto nga si Cabugao diay ang nipirma sa purchase request (PR) niadtong Abril 11, 2005 para sa 500 litros nga kemikal nga balor og P1.2 milyones.
-o0o-
Gipakauwawan ni Cabugao di lang ang iyang buhatan kon dili hasta nang iyang propesyon. Maayo kaayo siyang niyangu-yango nilang DOH 7 Director Susana Madarieta ug ubang eksperto sa ilang pagkuwestiyon sa padayong pagamit sa fogging machines ug mga kemikal. Pero sa tago nagpanilap diay siyang nipirma sa PR.
Naglaom ko nga nauwaw si Cabugao sa iyang gihimo. Kay dungan sa iyang pagkuwestiyon sa pagdeklarar og state of calamity sa Cebu City Council, duha ka buwan human niya pirmahi ang PR, iya man sang gisaway ang pagpamalit sa lokal nga mga opisyal labi na sa mga barangay kapitan sa mga kemikal ug fogging machines.
Mas dako hinuon ang akong pagduda nga si Cabugao morang lusay. Way klaro. Nagpaanod lang bisan asa ihapak sa mga bawod.
-o0o-
Kay pila ka adlaw human nisupak sa deklarasyon sa state of calamity, ambot gikunsaran bag di ingon nato o tinuod nga gikasab-an siyag konsehal, gisuportahan na sab niyang ahat nga deklarasyon. Way kaikog ni Dr. Eric Tayag, pangu sa National Epidemiology Center, kinsa nangisog pag-nawong sa mga konsehal atol sa special session sa niaging semana nga dakong sayop ang ilang gihimo.
Mosimpatiya ko ni Cabugao kon nahadlok lang siya sa mga politiko nga nanghilabot sa iyang trabaho aron pagduso sa personal nilang mga interes, sama sa pagpangomisyon sa minilyon ka pesos nga balor sa kemikal. Pero kon tugotan na lang sang mabuong ang iyang kadungganan pinaagi sa way kinutobang nukus-nukos ug atras-abante, mahukasan na sa iyang kaligdong pagpabilin sa puwesto.
-o0o-
Kasaligan nakong tinubdan nagbutyag nga si Cabugao di na bag-o sa politika. Natudlo siya sa puwesto kay lider sa BO-PK sa Barangay Tinago. Nidagan siya pagka barangay kapitan pero gilampornas ni Kapitan Joel Garganera.
Mao diayng wa managana pagpagamit sa iyang upisina sa mga politiko. Angay hinuong tubagon ang mas seryusong pasangil: Tinuod bang gipangilisan ang sinaligang mga opisyal sa City Health maong nagkayamukat ron ang kampanya sa dengue? [30] leo_lastimosa@abs-cbn.com
No comments:
Post a Comment