IKADUHANG LALIS
Ang init nga lalis sa gahom sa Cebu Provincial Board pagsubli ug pag-aprobar sa tanang kontrata nga sudlan ni Gobernador Gwendolyn Garcia di maoy unang engkuwentro tali sa Kapitolyo ug sa lokal nga mga opisyal sa Commission on Audit (COA). Nagkabangga na sab niadto silang kanhi gobernador Pablo Garcia, amahan ni Gwen, ug si Atty. Roy Ursal, ang regional legal and adjudication director sa COA 7, nga mao gihapoy nibaraw sa bag-ong liderato sa probinsiya.
Ang sentro sa karaang lalis, nga niabot gyod sa Korte Suprema, mao ang pagamit sa Kapitolyo sa Special Education Fund (SEF) para sa suholan sa mga magtutudlo ug ubang galastohan nga wa maapil sa orihinal nga mga lagda. Ang desisyon sa labawng hukmanan, nga kabahin na sa mga balaod sa nasud, nipatigbabaw sa legalidad pagamit sa SEF pag-suweldo sa mga magtutudlo pero nipatigbabaw sab sa baruganan ni Ursal nga di discretionary para sa local school boards ang pagasto sa SEF.
-o0o-
Nagtoo si Ursal nga ang kontrobersiya sa pag-insistir sa bag-ong gobernador nga di siya mananghid sa provincial board kada pirma niyag kontrata, nga niresulta sa pagkuwestiyon sa COA sa labing menos 15 ka kontrata nga balor og P102 milyones nga gisudlan sa duha ka nagsunod nga administrasyon sa Kapitolyo sa tibuok 2004, sama sa lalis sa SEF, moabot sab sa labawng hukmanan. Masaligon sab si Ursal nga, sama sa unang kaso, makahukom dayong Korte Suprema sud lang sa unom ka buwan.
Si Ursal gisuportahan sa mayoriya sa board members nga gipangulohan ni Board Member Luigi Quisumbing nga nipasaka og kaso sa Visayas Ombudsman pagkuwestiyon sa mga kontrata sa security ug janitorial services nga wa iagi sa provincial board. Masaligon silang Ursal ug Quisumbing nga ipatigbabaw sa korte ang gahom sa board pagsubli sa mga transaksiyon sa gobernador.
Kumbinsido si Quisumbing nga may gitagoan ang gobernador kay gihikaw gikan sa board ang mga kontrata, nga ila na lang nahibaw-an tungod sa report sa COA.
-o0o-
Sukwahi sa gitoohan ni Ursal nga si kanhi gobernador Garcia ang utok sa declaratory relief nga gipangayo sa Kapitolyo gikan sa korte, si Atty. Pablo John Garcia, Capitol Legal Consultant, niingon nga ang iyang maguwang nga si Gwen ang nisugyot ngadto sa ilang amahan nga di na sila magbalikbalik sa provincial board kada sud nilag transaksiyon. Gigamit ni Gwen ang iyang kasinatian isip consultant sa mayor sa Ormoc City sa Leyte sa wa pa siya mahimong consultant sa iyang amahan sa Kapitolyo.
Matod ni Pablo John gawas sa Ormoc, ang mga mayor sa ubang local government units, sama sa Mandaue City, namirma nag mga kontrata nga way pagtugot sa ilang lokal nga mga bay balaoranan kay pinasikad lang sa napasar nga tinuig nga mga budget ordinance. [30] leo_lastimosa@abs-cbn.com
No comments:
Post a Comment