Arangkada for September 27, 2005

 

        TAN SUSPENSUHON

 

        Bisan gihunong na sa kadagkoan sa Cebu State College of Science and Technology (CSCST) ang pagkolekta sa makabungog nilang honorarium sa evening program, nga gideklarar na sa Commission on Audit (COA) ug sa Department of Budget and Management (DBM) nga nakalapas sa DBM Circular 2003-5, di angayng hunungon sa Visayas Ombudsman ug ubang ahensiya ang imbestigasyon sa gipasangil nga dagkong anomaliya sa main campus ug ubang satellite schools sa CSCST.

        May sukaranan gani ang awhag sa nagpakabana nga mga magtutudlo ug mga tinun-an sa CSCST nga aron makabuylo gyong imbestigasyon, angayng ipaubos sa prevention suspension silang Dr. Jose Sal Tan, presidente sa CSCST, ug ubang opisyal nga gipasanginlang maoy mga utok sa makauuwaw nga palusot nga giingong nakapaburot sa pribado nilang mga bolsa pero nakahikaw sa batakang mga panginahanglan sa mga tinun-an.

-o0o-

        Ang preventive suspension maoy kasagarang dangpan sa mga imbestigador sa sensitibong mga kaso, labi na kon ang mga opisyal nga gipaubos sa imbestigasyon naa sa posisyon sa pagsabotahe sa pakisusi pinaagi sa paguba sa mga ebidensiya ug paghulga sa mga saksi.   Di malalis nga silang Tan ug kaubanan, kon magpabilin sa puwesto, makahimo paglisudlisod sa mga imbestigador pinaagi sa pagtago o paguba sa mga dokumento o paghaylo, paghudlat ug pagpahilom sa mga saksi sa gisusi nga transaksiyon.

        Hinaot nga si Ombudsman Director Virginia Palanca-Santiago ug ubang mga imbestigador motuon sa kamakiangayon sa awhag.   Kay di pa igo nga nahunong nang binuang, angay sang pugson silang Tan ug kaubanan pag-uli sa kinatibuk-ang makabungog nga honorarium nga ilegal nilang nadawat.

Gawas nga susihon sab may sukaranan bang pagpasaka og pormal nga mga kasong kriminal ug administratiba, nga mahimong moresulta sa pagkapriso o pagkataktak sa puwesto nilang Tan ug kaubanan.

-o0o-

        Samtang nakaagas nag balik ang mga gripo sa CSCST, human sa pipila ka buwan nga gipasagdan ni Tan pabor sa makabungog nilang honorarium, nangreklamo gihapong mga tinun-an nga ang tubig sa mga pansayan kutob ra sa alas-dos sa hapon.   Ug tungod sa tinguwan, nabisto nga busluton diayng mga atop, maong nagbanaw ang pila ka bahin sa engineering building.

        Nagkuwang sang mga lingkoranan sa classrooms.   Kini ug uban pang problema mahimong wa makit-i nilang Tan ug kaubanan tungod sa kadaghan sa ilang raket o, hinaot nga di tinuod, nahigot pag-ihap sa makabungog nilang honorarium sa subjects nga wa nila maserbisyohi.

-o0o-

        Mas modako pa gyong eskandalo kon itandi ang kakabos sa batakang serbisyo sa CSCST sa kahamaguway ug kaabunda sa kahimanan nga gipangompra sa kadagkoan para sa ilang kaugalingon.    

        Si Dr. Victor Villaganas, bise presidente sa CSCST, gipasanginlan nga nihimo sa usa sa dakong academic rooms isip iyang upisina nga gihingpitan sa desktop ug laptop computers, dakong TV set, digital cameras, pansayan ug kaligoanan ug upat ka sekretarya.   [30]  leo_lastimosa@abs-cbn.com