SI TAN SUPERMAN?
Kusganong gidudahan nga dunay anting-anting si Dr. Jose Sal Tan, ang presidente sa Cebu State College of Science and Technology (CSCST). Kay duna siyay katakos pagtuman og daghang gimbuhaton ug pag-adto og daghang lugar sa usa lang ka higayon.
Gawas nga nagdawat si Tan og makabungog nga P125,000 nga binuwan nga honorarium sa isip resource lecturer sa 28 ka subjects, nga klarong wa maserbisyohi kon nagtuman pa sa iyang trabaho pagka presidente sa tibuok sistema sa CSCST, gipasanginlan pa gyod siya nga nagdawat sab og honorarium sa pagpresentar ug lain na sang honorarium sa pagpanalipod sa gatosan ka thesis proposals sa mga tinun-an kada tuig tingtungha, gawas nga nakakuha pa gyod siyag makalilisang nga gidaghanon sa doctorates ug ubang mga kurso, kansang mga klase gitoohang wa sab niya matambongi.
-o0o-
Nahimo ni Tan kining tanang gimbuhaton bisan kon magkinahanglan na siyag lente aron makabasa. Giingong hanap na kaayong iyang panan-aw nga kinahanglan na siyang agakon aron makatikang sa stage sa iyang pagtambong sa mga programa sa nagkalainlaing mga eskuylahan sa CSCST. Gikataho pa gani nga giyahan nang iyang kamot aron makatultol sa mga blangko sa mga dokumento nga kinahanglan niyang pirmahan.
Pero ang labing ngilngig nga abilidad ni Tan mao ang paglusot sa daghang higanteng mga anomaliya nga gipasangil batok niya. Ambot tungod ba kay gibahinan sa gikuwestiyon nga mga honorarium ug ubang mga benepisyo ang labing suod nga mga opisyal ug mga kawani nga naglibot niya; o tinuod bang gipiskan sang mga sakop sa Board of Trustees sa CSCST nga maoy niaprobar sa iyang gipatuman nga buslutong mga sistema nga giingong giumol aron lang pagpaburot sa ilang pribadong bolsa, bahala nang interes sa eskuylahan ug mga tinun-an.
-o0o-
Nagpakabanang mga kawani sa CSCST Carmen Campus sa amihanang Sugbo nipada nako og kopya sa programa sa 39 th Commencement Exercises sa ilang eskuylahan nga nagpakita nga nagdungan pagpaso silang Tan ug ang labing dagkong mga opisyal sa CSCST isip mga gradwado sa Associate in Industrial Engineering niadtong Marso 3, 2003.
Gawas ni Tan, nigradwar sab silang Dr. Victor D. Villaganas, vice pres., Dr. Venerando D. Cuñado, superintendente sa Carmen campus; ug ang ubang college superintendents nga silang Dr. Ponciano C. Buntia, Dr. Florencio L. Ramos, Dr. Pedrito C. Pontillas, Dr. Reynaldo T. Gabales, Dr. Severino R. Romano, Dr. Wilma R. Reyes, Dr. Hospicio S. Saniel, Prof. Rodulfo B. Burgos ug Engr. Edgardo Emphasis.
Apil sab silang Dr. Panfilo E. Ciriaco, dean sa College of Industrial Technology and Engineering; Dr. Rolando H. Arpilleda, ang instructor nga giingong nidungan pagradwar sa iyang mga tinun-an; Dr. Celbert M. Himang, pag-umangkon ni Tan; Dr. Cynthia Sy, direktor sa CSCST; ug Engr. Samuel Dy, sakop sa Board of Trustees. [30] leo_lastimosa@abs-cbn.com
No comments:
Post a Comment